Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 260 Hüküm no: 259 Orijinal metin no: [37b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kürkçübaşı mahallesinden Hafize bt. Üveys’in kendini boşayan kocasından haklarını alarak zimmetini ibra etmesi Tatlîk, mehrin bir mikdârını ahz mâ‘adâdan ibrâ Mahmiye-i İslâmbol’da Topkapısı dâhilinde Kürkçübaşı mahallesinde sâkine ve zâtı vech-i şer‘î üzere mu‘arrefe olan Hafize bt. Üveys nâm hatun meclis-i şer‘-i şerîf-i enverde zevc-i mutallıkı işbu bâ‘isü’l-vesîka el-Hâc Osman b. Hasan nâm kimesne mahzarında ikrâr ve takrîr-i kelâm edip mezbûr el-Hâc Osman zevc-i dâhilim olduğu hâlde târih-i kitâbdan dört gün mukaddem beni tatlîk etmekle zimmetinde ma‘kūdun-aleyh olan yirmi beş guruş mehr-i müeccelimin on beş guruş ile nafaka-i mu‘ayyene ve meûnet-i süknâm içün bi’t-terâzî beynimizde ta‘yîn olunan beş guruş ki cem‘an yirmi guruş zevc-i mutallıkım mezbûr yedinden ahz ü kabz edip mehr-i müeccel-i mezkûrun bâkīsi olan on guruşa ve bi’l-cümle hukūk-ı zevciyete müte‘allika âmme-i de‘âvî ve kâffe-i mutâlebâtdan ber zevc-i mutallıkım mezbûr el-Hâc Osman’ın zimmetini ibrâ-i âm ile ibrâ ve ıskāt eylediğimde ol dahi kezâlik hukūk-ı zevciyete müte‘allika âmme-i de‘âvîden benim zimmetimi ibrâ ve ıskāt edip herbirimiz ber-minvâl-i muharrer âharın ibrâsını kabûl eyledik dedikde gıbbe’t-tasdîk. Fî 3 min-Ra sene 1197 Şühûdü’l-hâl: Molla Ali b. Halil, Ali Ağa b. Mehmed, Salih b. Halil, Hacı Hasan b. Osman.