Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 261 Hüküm no: 260 Orijinal metin no: [37b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Çavuş mahallesinden Fatma bt. Mehmed’in bazı eşyasını Hadice bt. Abdullah’a satması Eşyâ mübâya‘ası Mahmiye-i İslâmbol’da İbrahim Çavuş mahallesinde sâkine Fatıma bt. Mehmed nâm hatun tarafından ber-vech-i âtî ikrâra vekîl olduğu Mehmed b. Mustafa ve İbrahim b. Halil nâm kimesneler şehâdetleriyle sâbit olan Derviş Mehmed b. Mustafa nâm kimesne meclis-i şer‘-i şerîf-i enverde mu‘arrefetü’z-zât işbu bâ‘isetü’l-kitâb Hadice bt. Abdullah nâm hatun mahzarında bi’l-vekâle ikrâr ve takrîr-i kelâm edip müvekkilem mezbûre Fatıma Hatun eşyâ-i memlûkesinden kıtık memlû dört çatma yasdık ve iki minder ve bir döşek ve bir çit yorgan ma‘a çârşeb ve bir baş yasdığı ve bir müsta‘mel hırka ve bir Şam alacası entari ve iki sahan ve bir tenceresini tarafeynden îcâb ve kabûlü hâvî bey‘-i bâtt-ı sahîh-i şer‘î ve safka-i vâhide ile mezbûre Hadice Hatun’a on beş guruşa bey‘ ve temlik ve teslîm ve semeni mütâlebesinden zimmetini ibrâ ve ıskāt eylediğinde ol dahi ber-vech-i muharrer iştirâ ve temellük ve tesellüm ve ibrâsını kabûl eyledi, ba‘de’l-yevm eşyâ-i muharrere-i mezkûre mezbûre Hadice Hatun’un mülk-i müşterâsı ve hakk-ı sarfı olup müvekkilem mezbûre Fatıma Hatun’un kat‘a alâka ve medhali kalmamışdır dedikde gıbbe’t-tasdîki’ş-şer‘î mâ-vaka‘a. Fî 4 min-Ra sene 1197 Şühûdü’l-hâl: Mehmed b. Mustafa, İbrahim b. Halil, İbrahim b. Salih, Salih b. Halil, Molla Ali b. Halil ve gayruhum.