Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 269 Hüküm no: 271 Orijinal metin no: [39a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Canbaziye mahallesinden Ahmed b. Mehmed’in Salih b. Mehmed aleyhine açtığı alacak davasından men edilmesi İsbât-ı eşyâ Mahmiye-i İslâmbol’da Canbaziye mahallesinde sâkin Ahmed b. Mehmed nâm kimesne meclis-i şer‘-i şerîf-i enverde işbu bâ‘isü’l-kitâb Salih b. Mehmed nâm kimesne mahzarında üzerine da‘vâ ve takrîr-i kelâm edip benim mahmiye-i mezbûrede el-Hâc Evhaddin mahallesinde sâkine ve mezbûr Salih’in zevcesi olduğu hâlde bundan akdem fevt olan Rukiye bt. Abdullah nâm dellâke zimmetinde cihet-i deyn-i şer‘îden beş guruş alacak hakkım olmağla meblağ-ı mezbûru kable’l-ahz ve’l-istifâ Rukiye Hatun fevt olup mecmû‘-ı terekesinden bir minder ve bir döşek ve bir yorgan ve beş zirâ‘ gömleklik bez ve iki don ve iki çârşeb ve iki şali entari ve bir siyâh kedi kürkü ve bir silecek ve iki havlu ve bir şalî şalvar ve bir çuka ferâce ve dört sahan ma‘a kapak ve üç tencere ve bir kahve ibriği ve iki tas ve bir güğüm ve bir tahta sandığını zevci mezbûr Salih bi’l-verâse ahz ü kabz etmekle meblağ-ı mezbûru müteveffât-ı mezbûrenin terekesinden olmak üzere mezbûr Salih’den taleb ederim dedikde mezbûr Salih dahi cevâbında müteveffât-ı mezbûrenin müdde‘î-i merkūma beş guruş deyni olduğunu ikrâr lâkin zevcem mezbûr[e] Rukiye Hatun hâl-i hayatında işbu sene-i mübâreke Muharremi’l-harâm’ının yirmi sekizinci günü zimmetimde ma‘kūdun-aleyh olan on beş guruş mehr-i müeccelini hibe-i sahîha-i şer‘iye ile hibe ve temlik ve eşyâ-i muharrere-i mezkûreyi dahi bi-safkatin vâhidetin otuz guruşa bey‘ ve temlik ve teslîm ve semeni mütâlebesinden zimmetimi ibrâ ve ıskāt eyledikde ben dahi ber-vech-i muharrer ittihâb ve iştirâ ve temellük ve tesellüm ve ibrâsını kabûl edip ol-vechile mehr-i mezkûr on beş guruşdan târih-i mezbûrdan beri zimmetim berî’e ve eşyâ-i muharrere-i mezkûre dahi mülk-i müşterâm olmuşdur deyü def‘le mukābele edicek, mezbûr Salih’den def‘-i meşrûhunu mübeyyin beyyine taleb olundukda udûl-ı ahrâr-ı ricâl-i Müslimînden sâlifü’z-zikr el-Hâc Evhaddin mahallesinde sâkinler Ali Efendi b. Mehmed ve Halil Efendi b. Mehmed li-ecli’l-istişhâd meclis-i şer‘a hâzırân olup istişhâd olunduklarında fi’l-hakīka mârrü’z-zikr el-Hâc Evhaddin mahallesinde sâkine iken bundan akdem fevt olan Rukiye bt. Abdullah nâm hatun hâl-i hayatında işbu sene-i mübâreke Muharremi’l-harâm’ının yirmi sekizinci günü zevci mezbûr Salih zimmetinde ma‘kūdun-aleyh olan on beş guruş mehr-i müeccelini hibe-i sahîha-i şer‘iye ile zevci mezbûra hibe ve temlik ve eşyâsından bir minder ve bir döşek ve bir yorgan ve beş zirâ‘ gömleklik bez ve iki don ve iki çârşeb ve iki şali entari ve bir siyâh kedi kürkü ve bir silecek ve iki havlu ve bir şalî şalvar ve bir çuka ferâce ve dört sahan bâ-kapak ve üç tencere ve bir kahve ibriği ve iki tas ve bir güğüm ve bir tahta sandığını dahi bi-safkatin vâhidetin zevci mezbûra otuz guruşa bey‘ ve temlik ve teslîm ve semeni mutâlebesinden zimmetini ibrâ ve ıskāt eylediğinde ol dahi ber-vech-i muharrer ittihâb ve iştirâ ve temellük ve tesellüm ve ibrâsını kabûl edip ol-vechile mehr-i mezkûr on beş guruşdan târih-i mezbûrdan beri zevci mezbûrun zimmeti berî’e ve eşyâ-i muharrere-i mezkûre dahi mülk-i müşterâsı ve hakk-ı sarfı olmuşdur, bizim bu husûs bu vech ma‘lûmumuzdur deyü herbiri meclis-i şer‘de edâ-i şehâdet-i şer‘iye etdiklerinde gıbbe ri‘âyeti şerâiti’l-kabûl şehâdetleri makbûle olmağın mûcebince müdde‘î-i mezbûr Ahmed meblağ-ı mezbûr beş guruş mutâlebesiyle mezbûr Salih’e bî-vech mu‘ârazadan men‘ birle mâ-vaka‘a bi’t-taleb. Fî 8 Ra sene 1197 Şühûdü’l-hâl: Şâhidûn-ı sâbıkūn.