Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 268 Hüküm no: 270 Orijinal metin no: [39a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Evhaddin mahallesinden Salih b. Mehmed’in Ayşe bt. Abdullah’taki eşyalarını teslim alması Ahz ü kabz Mahmiye-i İslâmbol’da el-Hâc Evhaddin mahallesinde sâkin Salih b. Mehmed nâm kimesne meclis-i şer‘-i şerîf-i enverde mu‘arrefetü’z-zât işbu bâ‘isetü’l-vesîka Âişe bt. Abdullah nâm hatun mahzarında ikrâr ve takrîr-i kelâm edip mahalle-i mezbûrede sâkine iken bundan akdem fevt olan zevcem Rukiye bt. Abdullah nâm dellâke yedinden hâl-i hayatında semen-i ma‘lûma müşterâ bâ-hüccet-i şer‘iye yedimde mâlım ve mülküm olan bir minder ve bir döşek ve bir yorgan ve beş zirâ‘ gömleklik bez ve iki don ve iki çârşeb ve iki şali entari ve bir siyâh kedi kürkü ve bir silecek ve iki havlu ve bir şalî şalvar ve bir çuka ferâce ve dört sahan ma‘a kapak ve üç tencere ve bir kahve ibriği ve iki tas ve bir güğüm ve bir tahta sandığıma mezbûre Âişe Hatun bi’l-emâne vâzı‘ü’l-yed olmağla eşyâ-i muharrere-i mezkûreyi mezbûre Âişe Hatun bana def‘ ü teslîm etmekle ben dahi bi-a‘yânihâ yedinden tamamen ahz ü kabz edip eşyâ-i muharrere-i mezkûreden mezbûre Âişe Hatun zimmetinde bir akçe ve bir habbe bâkī kalma[ma]ğla husûs-ı mezkûra müte‘allika âmme-i de‘âvî ve kâffe-i mutâlebâtdan mezbûre Âişe Hatun’un zimmetini ibrâ ve ıskāt eylediğimde ol dahi ibrâmı kabûl eyledi dedikde gıbbe’t-tasdîki’ş-şer‘î. Fî 8 Ra sene 1197 Şühûdü’l-hâl: Şâhidûn-ı sâbıkūn.