Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 270 Hüküm no: 273 Orijinal metin no: [39b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacce Hatun mahallesinden Marat v. Manuk’un oğlu Serope’den miras kalan dülbentçi dükkânı gediği hissesini Serope v. Kabriyel’e satması Gedik mübâya‘ası Mahmiye-i İslâmbol’da Hacce Hatun mahallesinde mütemekkin iken bundan akdem hâlik olan Serope zimmînin babası ve hasran vârisi Marat v. Manuk nâm zimmî meclis-i şer‘-i şerîf-i enverde işbu hâmilü’r-rakīm Serope v. Kabriyel nâm zimmî muvâcehesinde bi’l-verâse ikrâr ve takrîr-i kelâm edip mahmiye-i mezbûrede Aksaray kurbünde Kebîr Kolluk civârında vâki‘ bir bâb dülbendçi dükkânı derûnunda mevcûd beyne’l-hıref gedik ta‘bîr olunur bir çam dolab ve bir peştahta ve bir altın terâzîsi ve dört kebîr dolab ve bir minder ve sâir âlât-ı lâzıme-i ma‘lûmenin nısf-ı şâyi‘i Ariton v. Tanil nâm zimmînin yedinde mülkü ve nısf-ı şâyi‘-i âharı dahi oğlum merkūm Serope zimmînin ile’l-helâk yedinde mülkü olup ba‘de helâkihî bana mevrûs olmağın ben mârrü’z-zikr gedik ta‘bîr olunan eşyâ-i muharrere ve sâir âlât-ı lâzıme-i ma‘lûmenin nısf-ı şâyi‘ini tarafeynden îcâb ve kabûlü hâvî bey‘-i kat‘î ve safka-i vâhide ile merkūm Serope zimmîye yüz guruşa bey‘ ve temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr yüz guruşu merkūm Serope zimmî yedinden tamamen ahz ü kabz eyledim, ba‘de’l-yevm mârrü’z-zikr gedik ta‘bîr olunan eşyâ-i muharrere ve sâir âlât-ı lâzıme-i ma‘lûmenin nısf-ı şâyi‘i merkūm Serope zimmînin mülk-i müşterâsı ve hakk-ı sarfı olup benim kat‘a alâka ve medhalim kalmamışdır dedikde gıbbe’t-tasdîki’ş-şer‘î mâ-vaka‘a. Fî 7 Ra sene 1197 Şühûdü’l-hâl: Molla Ali b. Halil, Salih b. Halil, Mustafa b. Mustafa. Karabet v. İstefan, Kazeros v. Markar, Sarrâf İstefan v. Miran.