Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 271 Hüküm no: 274 Orijinal metin no: [39b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Denizabdal mahallesinden İbrahim Ağa b. Abdullah’ın vasiyeti Husûs ile vasiyet Husûs-ı âti’l-beyânın mahâllinde ketb ü tahrîri iltimâs olunmağın kıbel-i şer‘den mezûnen meb‘ûs Mevlana Hafız Numan Efendi mahmiye-i İslâmbol’da Deniz Abdal mahallesinde vâki‘ İbrahim Ağa b. Abdullah’ın müsteciren sâkin olduğu menzile varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i âlî etdikde mezbûr İbrahim Ağa meclis-i ma‘kūd-ı mezkûrda Silahdâr Kalemi küttâbından işbu bâ‘isü’l-vesîka es-Seyyid Mehmed Tâhir Efendi b. es-Seyyid Numan mahzarında ikrâr ve takrîr-i kelâm edip ben bi-emrillâhi te‘âlâ vefât eylediğimde mezbûr es-Seyyid Mehmed Tâhir Efendi benim vasîyy-i muhtârım olup mecmû‘-ı terekemi ahz ü kabz edip evvelâ vech-i mesnûn üzere techîz ve tekfîn ve defnim umûruna terekemden otuz guruş harc ü sarf eyledikden sonra bâkī kalan terekemin sülüsünü ifrâz ve sülüs-i mezbûrdan yirmi guruş ıskāt-ı salât-ı fâitem ve beş guruş kefâret-i yemîn ve savm ve sâir nüzûrâtım içün fukarâ-i Müslimîn beyninde devr ve tasadduk oluna ve sülüs-i mezbûrdan on beş guruş ile iki aded taş iştirâ ve merkadimin baş ve ayak câniblerine vaz‘ etdire ve yine sülüs-i mezbûrdan yirmişer guruş hediyeli beş aded Mushaf-ı şerîf iştirâ ve vakfiyet üzere talebe-i ulûmdan birer müstahak kimesnelere verile ve sülüs-i mezbûrdan her ne fazla kalır ise hizmetimde olup bundan akdem i‘tâk eylediğim işbu hâzır bi’l-meclis Selim b. Abdullah’a verile ve sülüsân-ı terekemi dahi vârislerim beynlerinde alâ-mâ-farazallâhu te‘âlâ tevzî‘ ve taksîm oluna deyü vasiyet ve tenfîzine mezbûr es-Seyyid Mehmed Tâhir Efendi’yi vasîyy-i muhtâr nasb ü ta‘yîn eyledim dedikde ol dahi ber-vech-i muharrer vesâyet-i mezkûreyi kabûl ve hizmet-i lâzımesin kemâ-yenbağī edâya ta‘ahhüd ve iltizâm eylediğini mevlana-yı mezbûr mahâllinde ketb ü tahrîr ba‘dehû mâ‘an meb‘ûs ümenâ-i şer‘le meclis-i şer‘a gelip alâ-vukū‘ıhî inhâ ve takrîr etmeğin mâ-vaka‘a bi’t-taleb. Fî 8 Ra sene 1197 Şühûdü’l-hâl: Hafız el-Hâc İbrahim Efendi b. Ahmed İmâm-ı mahalle-i Ördek Kasab, Hasan Efendi Mücellid, Feyzullah Odabaşı b. İbrahim, Başçukadâr Ahmed Ağa b. ( ), İbrahim Efendi b. Ahmed, es-Seyyid Salih b. es-Seyyid Numan, Molla Ali b. Halil.