Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 273 Hüküm no: 276 Orijinal metin no: [39b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Urmiye kazası Gora köyünden Aci Dimitri’nin bağını Dimitri v. Papa Kiric’e satması Bağ mübâya‘ası Vilâyet-i Rumeli’nde Urmiye kazâsına tâbi‘ Gora karyesi ahâlisinden olup mahmiye-i İslâmbol’da Yedikule hâricinde Taşhan’da mütemekkin Aci Dimitri v. Yorgi İstemat nâm zimmî tarafından husûs-ı âti’l-beyânı ikrâra vekîl olduğu Polhoron v. Rizo ve Todori ve Dimitri nâm zimmîler şehâdetleriyle sâbit olan diğer Polhoron v. Dimitri ve Beço nâm zimmî meclis-i şer‘-i şerîf-i enverde işbu hâmilü’r-rakīm Dimitri v. Papa Kiric nâm zimmî muvâcehesinde bi’l-vekâle ikrâr ve takrîr-i kelâm edip müvekkilim merkūmun yedinde mülkü olup karye-i mezbûrede vâki‘ bir tarafdan diğer Aci Dimitri zimmî bağı ve bir tarafdan Yani Anaştaş zimmî [40a] bağı ve bir tarafdan Todori Karvil zimmî bağı ve bir tarafdan tarîk-i âm ile mahdûd üç dönüm mikdârı kürûmu mülk bir kıt‘a bağını tarafeynden îcâb ve kabûlü hâvî bey‘-i bâtt-ı sahîh-i şer‘î ile merkūm Dimitri zimmîye elli guruşa bey‘ ve temlik ve mahâllinde kabza taslît eylediğinde ol dahi ber-vech-i muharrer iştirâ ve temellük ve kabûl eyledikden sonra semeni olan meblağ-ı mezbûr elli guruşu müvekkilim merkūm Eci Dimitri zimmî merkūm Dimitri zimmî yedinden tamamen ahz ü kabz eyledi, ba‘de’l-yevm bağ-ı mahdûd-ı mezkûr merkūm Dimitri zimmînin mülk-i müşterâsı ve hakk-ı sarfı olup müvekkilim merkūm Aci Dimitri zimmînin kat‘a alâka ve mehdali kalmamışdır dedikde gıbbe’t-tasdîki’ş-şer‘î mâ-vaka‘a. Fî 12 Ra sene 1197 Şühûdü’l-hâl: Molla Ali b. Halil, Salih b. Halil, Mustafa b. Mustafa. Yorgo v. Eci Dimitri, diğer Eci Dimitri v. Kanomo, Papa Yani v. İsteryo, Kostandi v. Kalçe, Nikola v. Kondiyan, Kostandi v. Eci Dimitri, Kano v. Harşiko ve gayruhum.