Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 272 Hüküm no: 275 Orijinal metin no: [39b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Es-Seyyid Ömer mahallesinden İva bt. Mardos’un annesi Meyrem’e gerdanlık ile kuşağını hibe etmesi ve bazı eşyalarını da satması Eşyâ mübâya‘ası Mahmiye-i İslâmbol’da es-Seyyid Ömer mahallesinde mütemekkine ve şahsı vech-i şer‘î üzere mu‘arrefe olan İva bt. Mardos nâm Nasrâniye meclis-i şer‘-i şerîf-i enverde anası olup kezâlik şahsı ta‘rîf-i şer‘î ile mu‘arrefe olan işbu bâ‘isetü’r-rakīm Meyrem bt. Delot nâm Nasrâniye muvâcehesinde ikrâr ve takrîr-i kelâm edip yedimde mâlım olan altı miskāl bir altın gerdâniye ve bir çift inci sagīr kuşağımı hibe-i sahîha-i şer‘iye ile anam mersûme Meyrem Nasrâniyeye hibe ve temlik ve teslîm eylediğimde ol dahi ber-vech-i muharrer meclis-i hibede bilâ-mâni‘ ittihâb ve temellük ve tesellüm ve kabz u kabûl eyledikden sonra eşyâ-i sâire-i memlûkemden yün memlû on beledî yasdık ve kıtık memlû dört çatma yasdık ve üç yemeni yorgan bâ-çârşeb ve iki beledî döşek telli Hatâyî ve çiçekli iki entari ve bir şali cübbe ve bir çuka ferâce ve on sahan ve bir tencere ve bir sini ve bir mankāl ve bir güğüm ve bir leğen ma‘a ibrik ve bir tahta sandığımı dahi tarafeynden îcâb ve kabûlü hâvî bey‘-i bâtt-ı sahîh-i şer‘î ve safka-i vâhide ile anam mersûme Meyrem Nasrâniyeye otuz guruşa bey‘ ve temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr otuz guruş mütâlebesinden dahi anam mersûme Nasrâniyenin zimmetini ibrâ ve ıskāt eylediğimde ol dahi ibrâmı kabûl eyledi, ba‘de’l-yevm zikr olunan altın gerdâniye ve inci kuşak anam mersûme Meyrem Nasrâniyenin mülk-i mevhûbesi ve eşyâ-i muharrere-i mersûme dahi mülk-i müşterâsı ve hakk-ı sarfı olup benim kat‘a alâka ve medhalim kalmamışdır dedikde gıbbe’t-tasdîk. Fî 11 min-Ra sene 1197 Şühûdü’l-hâl: Molla Ali b. Halil, Hacı Hasan b. Osman, Mustafa b. Mustafa, Natfi? v. Asvador Terzi, Sıvacı Manol v. ( ) ve gayruhum.