Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 274 Hüküm no: 278 Orijinal metin no: [40a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tercan kazası Vican köyünden olup Vize kazası Sergen köyünde vefat eden Ebubekir b. Hasan’ın vârisinin kardeşi Ali olduğunun tespiti İsbât-ı verâset Fi’l-asl vilâyet-i Anadolu’da Erzurum sancağında Tercan kazâsına tâbi‘ Vican karyesi ahâlisinden olup vilâyet-i Rumeli’de Vize kazâsına tâbi‘ Sergen karyesinde sâkin Hâssa hasekilerinden el-Hâc Ebûbekir Ağa’nın hizmetinde iken bundan akdem vefât eden Ebûbekir b. Hasan b. Mehmed nâm kimesnenin li-ebeveyn er karındaşı ber-vech-i âtî verâset iddi‘â eden işbu râfi‘ü’l-vesîka Ali b. el-mezbûr Hasan nâm kimesne meclis-i şer‘-i şerîf-i enverde Mehmed b. Mustafa nâm kimesne mahzarında üzerine da‘vâ ve takrîr-i kelâm edip müteveffâ-yı mezbûr Ebûbekir ile ben li-ebeveyn er karındaşlar olup babamız ismi mezbûr Hasan ve dedemiz ismi mezbûr Mehmed ve anamız ismi Fatıma bt. Abdurrahman ve maskat-ı re’simiz mârrü’z-zikr Vican karyesi olup müteveffâ-yı mezbûrun verâseti min-ciheti’l-usûbeti’n-nesebiyye bana münhasıra ve benden gayrı vârisi ve terekesine müstahakk-ı âharı olmamağla karındaşım müteveffâ-yı mezbûrun mezbûr Mehmed zimmetinde cihet-i karzdan beş guruş alacak hakkı olup meblağ-ı mezbûru kable’l-ahz ve’l-istifâ karındaşım mezbûr Ebûbekir fevt ve meblağ-ı merkūm bi’l-irsi’ş-şer‘î bana isâbet etmekle meblağ-ı merkūm beş guruşu mezbûr Mehmed[‘den] bi’l-verâse taleb ederim, suâl olunup alıverilmesi matlûbumdur dedikde gıbbe’l-istintâk mezbûr Mehmed dahi cevâbında fi’l-vâki‘ müteveffâ-yı mezbûr Ebûbekir’e cihet-i merkūmeden beş guruş hâlâ zimmetinde deyni olduğunu ikrâr lâkin müdde‘î-i mezbûr Ali’nin verâsetini inkâr edicek, müdde‘î-i merkūm Ali’den ber-vech-i muharrer müdde‘âsını mübeyyin beyyine taleb olundukda udûl-ı ahrâr-ı ricâl-i Müslimînden ve sâlifü’z-zikr Vican karyesi ahâlisinden Ahmed b. Mustafa ve Cafer b. Mustafa nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka müteveffâ-yı mezbûr Ebûbekir işbu müdde‘î-i merkūm Ali ile li-ebeveyn er karındaşlar olup babaları ismi Hasan ve dedeleri ismi Mehmed ve anaları ismi Fatıma bt. Abdurrahman ve maskat-ı re’sleri vilâyet-i Anadolu’da Erzurum sancağında Tercan kazâsına tâbi‘ Vican karyesi olup müteveffâ-yı mezbûrun verâseti min-ciheti’l-usûbeti’n-nesebiyye işbu müdde‘î-i mezbûr Ali’ye münhasıra ve müdde‘î-i mezbûrdan gayrı vârisi ve terekesine müstahakk-ı âharı olduğu ma‘lûmumuz olmamağla biz bu husûsa bu vech üzere şâhidleriz, şehâdet dahi ederiz deyü herbiri edâ-i şehâdet-i şer‘iye etdiklerinde gıbbe ri‘âyeti şerâiti’l-kabûl şehâdetleri makbûle olunmağın mûcebince ba‘de’l-hükm ve’t-tenbîh mâ-vaka‘a bi’t-taleb ketb olundu. Fî 28 min-Saferi’l-hayr sene 1197 Şühûdü’l-hâl: Ahmed b. Mustafa, Cafer b. Mustafa, Molla Ali b. Halil, Hacı Hasan b. Osman ve Salih b. Halil ve gayruhum.