Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 275 Hüküm no: 279 Orijinal metin no: [40a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Başcı Mahmud mahallesinden Ayşe bt. Hüseyin’in kocasına mehrini hibe etmesi ve bazı eşyalarını da satması Eşyâ mübâya‘ası ve mehrini hibe Mahmiye-i İslâmbol’da Başcı el-Hâc Mahmud mahallesinde sâkine Âişe bt. Hüseyin nâm hatun tarafından husûs-ı âti’l-beyânı ikrâra vekîl olduğu zât-ı mezbûreyi ârifân Hasan Odabaşı b. Ahmed ve Ahmed Odabaşı b. Mustafa nâm kimesne[ler] şehâdetleriyle sâbit olan mahalle-i mezbûre imâmı Mehmed Said Efendi b. Mehmed Efendi meclis-i şer‘-i şerîf-i enverde müvekkile-i mezbûrenin hâlâ zevci işbu bâ‘isü’l-kitâb Ali Ağa b. Mustafa nâm kimesne mahzarında bi’l-vekâle ikrâr ve takrîr-i kelâm edip müvekkilem mezbûre Âişe Hatun zevci mezbûr Ali Ağa zimmetinde ma‘kūdun-aleyh olan on guruş mehr-i müeccelini hibetü’d-deyn mimmen aleyhi’d-deyn sahîhatün fehvâsınca zevci mezbûra hibe ve temlik eylediğinde ol dahi ber-vech-i muharrer ittihâb ve temellük ve kabûl eyledikden sonra eşyâ-i sâiresinden keten memlû yedi yasdık ve üç minder ve iki çit mak‘ad ve iki çit yorgan ve iki baş yasdığı ve bir sincab kürk ve bir şali entari ve bir şali cübbe ve bir çuka ferâce ve iki bez gömlek ve iki değirmi baş yemenisi ve dört sahan ve iki tencere ve bir ibrik ve bir ocak güğümü ve bir tasını dahi tarafeynden îcâb ve kabûlü hâvî bey‘-i bâtt-ı sahîh-i şer‘î ve safka-i vâhide ile zevci mezbûr Ali Ağa’ya otuz guruşa bey‘ ve temlik ve teslîm eylediğinde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr otuz guruş mutâlebesinden dahi müvekkilem mezbûre zevci mezbûr Ali Ağa’nın zimmetini ibrâ ve ıskāt eylediğinde ol dahi ibrâsını kabûl eyledi, ba‘de’l-yevm mehr-i mezkûr on guruşdan zevci mezbûr Ali Ağa’nın zimmeti berî ve eşyâ-i muharrere-i mezkûre dahi mülk-i müşterâsı ve hakk-ı sarfı olup müvekkilem mezbûre Âişe Hatun’un kat‘a alâka ve medhali kalmamışdır dedikde gıbbe’t-tasdîki’ş-şer‘î mâ-vaka‘a bi’t-taleb. Fî 15 Ra sene 1197 Şühûdü’l-hâl: İbrahim b. Osman, Hüseyin b. Osman, el-Hâc Ömer b. Mustafa, Leblebici Hüseyin Ağa b. Hasan, Hasan Odabaşı b. Ahmed, Ahmed Odabaşı b. Mustafa ve Molla Ali b. Halil ve gayruhum.