Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 276 Hüküm no: 281 Orijinal metin no: [40b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Es-Seyyid Ömer mahallesinden Ahmed Beşe’nin Ayşe bt. Abdullah’tan satın aldığı evin yanması üzerine yeniden yaptırdığı eve ait hüccetin kendisine verilmesini istemesi İstihbâr-ı menzil Mahmiye-i İslâmbol’da es-Seyyid Ömer mahallesinde sâkin işbu bâ‘isü’l-vesîka Ahmed Beşe b. Mehmed nâm kimesne meclis-i şer‘-i şerîf-i enverde takrîr-i kelâm ve bast-ı merâm edip mahalle-i mezbûrede vâki‘ bir tarafdan Ali Çavuş menzili arsası ve bir tarafdan Habib Beşe menzili arsası ve iki tarafdan tarîk-i âm ile mahdûd terbî‘an yüz elli zirâ‘ arsa üzerinde mevcûd ma‘lûmü’l-müştemilât bir bâb mülk menzil bin yüz altmış yedi senesi gāibe ani’l-meclis Zenciye Âişe bt. Abdullah nâm hatundan iki yüz otuz guruş semen-i medfû‘ ve makbûza müşterâ bâ-hüccet-i şer‘iye yedimde mülk ve hakkım iken menzil-i mezkûr ile yedimde olan mülknâme hüccetim bundan akdem vâki‘ olan harîk-i kebîr’de muhterik olup arsa sırfa kalmağla arsa-i mezkûre üzerine müceddeden fevkānî bir bâb oda ve bir sofa ve kenîf ihdâs edip lâkin menzil-i mezkûr ber-vech-i muharrer mülk-i müşterâm olduğunu müş‘ir yedimde hüccetim olmamağla takrîrim vukūf-ı tammı olan bî-garaz Müslimînden suâl ve istihbâr ve haberleri zabt u tahrîr ve kıbel-i şer‘den hüccet olunup yedime i‘tâ olunmak matlûbumdur dedikde fi’l-hakīka menzil-i mahdûd-ı mezkûr mukırr-ı mezbûr Ahmed Beşe’nin târih-i mezbûrda gāibe mezbûre Zenciye Âişe Hatun’dan semen-i merkūm-ı medfû‘ ve makbûza müşterâ bâ-hüccet-i şer‘iye yedinde mülkü olduğunu mahalle-i mezbûre ahâlisinden es-Seyyid Mehmed Efendi b. es-Seyyid Mehmed ve Ahmed Beşe b. Cafer nâm kimesneler meclis-i şer‘de alâ-tarîki’ş-şehâde haber vermeleriyle vâki‘ü’l-hâl hıfzen li’l-makāl bi’t-taleb. Fî 14 Ra sene 1197 Şühûdü’l-hâl: Es-Seyyid Mehmed Efendi b. es-Seyyid Mehmed, Ahmed Beşe b. Cafer, Molla Ali b. Halil, Salih b. Halil ve gayruhum.