Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 277 Hüküm no: 282 Orijinal metin no: [40b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Cemaleddin mahallesinden Emetullah Hatun’un kocası Hüseyin Ağa’dan satın aldığı evin yanması üzerine arsasının kendine ait olduğunu bildiren hüccetin verilmesini istemesi İstihbâr-ı arsa Mahmiye-i İslâmbol’da hısnı ebvâbından Eğrikapı hâricinde Cemaleddin mahallesinde sâkine ve zâtı ta‘rîf-i şer‘î ile mu‘arrefe olan işbu bâ‘isetü’l-vesîka Emetullah Hatun bt. Osman meclis-i şer‘-i hatîr-i lâzımü’t-tevkīrde takrîr-i kelâm ve bast-ı merâm edip mahmiye-i mezbûrede Sarıgez kurbünde Çıkrıkçı Kemal mahallesinde vâki‘ bir tarafdan mevâlî-i kirâmdan Ömer Efendi menzili arsası ve bir tarafdan İmâm Hasan Efendi menzili arsası ve bir tarafdan Şah Mehmed Efendi Vakfı’ndan Kalaycı İbrahim tasarrufunda olan vakıf arsa ve ba‘zan odalar ve bir tarafdan tarîk-i âm ile mahdûd büyût-ı adîde ve müştemilât-ı sâireyi hâvî bir bâb mülk menzil bundan akdem vefât eden zevcim Hüseyin Ağa b. Bayram nâm kimesnenin yedinde mülk ve hakkı olduğu hâlde zevcim mezbûr Hüseyin Ağa bin yüz doksan beş senesi Cemâziyelevvel’inin üçüncü günü menzil-i mahdûd-ı mezkûrun nısf-ı şâyi‘ini iki bin beş yüz guruşa bana bey‘ ve temlik ve teslîm ve ben dahi iştirâ ve temellük ve tesellüm eylediğimden sonra semeni olan meblağ-ı mezbûr iki bin beş yüz guruş mütâlebesinden benim zimmetimi ibrâ ve yedime bir kıt‘a mübâya‘a hücceti i‘tâ edip menzil-i mahdûd-ı mezkûrun nısf-ı şâyi‘i bâ-hüccet-i şer‘iye yedimde mülk ve hakkım iken menzil-i mezkûr ve yedimde olan mülknâme hüccetim bundan akdem vâki‘ olan harîk-i kebîr’de muhterik olup ancak arsa-i memlûke-i mezkûresi kalmağla arsa-i mezkûrenin nısf-ı şâyi‘i ber-vech-i muharrer mülk-i müşterâm olduğu vukūf-ı tammı olan bî-garaz Müslimînden suâl ve istihbâr ve haberleri zabt u tahrîr ve kıbel-i şer‘den hüccet olunup yedime i‘tâ olunmak matlûbumdur dedikde kasaba-i Tophâne’de Cihangir mahallesi sâkinlerinden el-Hâc Mehmed Said Ağa b. Mehmed ve Davudpaşa mahallesi ahâlisinden Molla Ali b. Halil ve Salih b. Halil ve Molla Mehmed b. Mustafa ve Ali Ağa b. Mehmed nâm kimesneler zât-ı mezbûreyi ârifûn oldukları hâlde li-ecli’l-ihbâr meclis-i şer‘a hâzırûn olup istihbâr olunduklarında fi’l-hakīka menzil-i mahdûd-ı mezkûrun nısf-ı şâyi‘i mukırre-i mezbûre Emetullah Hatun’un zevci olup bundan akdem vefât eden Hüseyin Ağa b. Bayram’dan ber-minvâl-i muharrer iki bin beş yüz guruşa müşterâ mülk-i mahzı ve hakk-ı sarfı olduğunu herbiri meclis-i şer‘de alâ-tarîki’ş-şehâde haber vermeleriyle vâki‘ü’l-hâl hıfzen li’l-makāl ketb olundu. Fî 15 min-Ra sene 1197 Şühûdü’l-hâl: Osman Ağa b. ( ) Ağa-yı Enderûn, Sarı Mehmed Ağa b. ( ), Halil Ağa Na‘lband, Molla Ali b. Halil, Salih b. Halil, Molla Mehmed b. Mustafa, Ali Ağa b. Mehmed, Hacı Hasan b. Osman.