Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 279 Hüküm no: 284 Orijinal metin no: [41a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Selanik Kadısı Hammamîzade Ali Efendi’nin vârislerinin Hasan Ağa’daki miras kalan alacaklarını vârislerinden istemeleri < Husûs Husûs-ı âti’l-beyânın mahâllinde ketb ü tahrîri iltimâs olunmağın bu fakīr bi-nefsihî mahmiye-i İslâmbol’da Cebecibaşı mahallesinde vâki‘ sâbıkā Kayseriye kādısı umdetü’l-mevâliyyi’l-izâm zübdetü’l-mehâdîmi’l-fihâm Şeyhzâde Sunullah Efendi Hazretlerinin sa‘âdet-hânelerine varıp zeyl-i kitâbda mektûbü’l-esâmî Müslimîn huzûrlarında akd-i meclis-i şer‘-i Nebevî olundukda sâbıkā medîne-i Selanik kadısı iken bundan akdem irtihâl-i dâr-ı bekā eden Hamamîzâde Ali Efendi b. el-Hâc Mustafa Efendi’nin verâseti sulbî kebîr oğlu müderrisîn-i kirâmdan Mehmed Râşid Efendi ile zevce-i metrûkesi Emine bt. Abdullah nâm hatuna inhisârı ba‘de’t-tahakkuki’ş-şer‘î mûmâ-ileyh Mehmed Râşid Efendi kendüden asâleten ve vâlidesi mezbûre Emine Hatun tarafından husûs-ı âti’l-beyânda vekîl olduğu zât-ı mezbûreyi ârifân Ebûbekir b. Ali ve Abdürrezzak b. İbrahim şehâdetleriyle sâbit olmağla vekâleten meclis-i ma‘kūd-ı mezkûrda sâbıkā kapıkethudâsı iken bundan akdem rıhlet-i dâr-ı bekā eden es-Seyyid Hasan Ağa b. el-Hâc İsmail’in verâseti zevce-i metrûkeleri Fatıma bt. Halil ve Mahbube bt. Abdullah nâm hatunlar ile sulbî kebîr oğlu es-Seyyid Mehmed Said Efendi’ye ve sulbiye sagīre kızı Şerife Emetullah’a münhasıra ve tashîh-i meselesi kırk sekiz sehmden olup sihâm-ı mezbûreden üçer sehmi zevceleri mezbûretâna ve yirmi sekiz sehmi oğlu mezbûra ve on dört sehmi merkūme Şerife Emetullah’a isâbeti tahakkukundan sonra zâtları şâhidân-ı mezbûrân ta‘rîfleriyle mu‘arrefeler işbu bâ‘isü’l-kitâb mezbûre Fatıma ve sagīre-i mezbûrenin vâlidesi ve tesviye-i umûrunu rü’yete bâ-hüccet-i şer‘iye vasîyy-i mansûbesi olan mezbûre Mahbube nâm hatunlar ile mezbûr es-Seyyid Mehmed Said tarafından husûs-ı âti’l-beyânda vekîl olduğu Mehmed Emin b. el-Hâc Yusuf ve es-Seyyid Ahmed b. Veliyüddin nâm kimesneler şehâdetleriyle sâbit olan Abdullah Ağa b. Mehmed mahzarında bi’l-asâle ve bi’l-vekâle ikrâr-ı tam ve takrîr-i kelâm edip mûrisimiz müteveffâ-yı mûmâ-ileyh Ali Efendi’nin hayatında müteveffâ-yı mezbûr es-Seyyid Hasan Ağa’nın hayatında zimmetinde ve cihet-i karzdan yedi bin beş yüz guruş hakkı olup ve meblağ-ı merkūm mukābelesinde müteveffâ-yı mezbûrun müstakıllen yedinde mülkü olup mahmiye-i mezbûrede Molla Gürânî mahallesinde vâki‘ ma‘lûmü’l-hudûd bir bâb menzilin bin sekiz yüz otuz beş buçuk zirâ‘ını ebniye-i memlûkesi ile mâ‘an bâ-hüccet-i şer‘iye bey‘ ve temlik ve teslîm ve menzil-i mezbûrun zikr olunan Molla Gürânî mahallesinde imâm olanlara yevmî bir akçe icâre-i müeccele ile meşrûta olan beş yüz beş zirâ‘ mahâllini bâ-ma‘rifet-i mütevellî yine mûrisimiz müteveffâ-yı mûmâ-ileyh Ali Efendi’ye ferâğ-ı mukayyed-i kat‘î ile fâriğ olmuş idi, lâkin menzil-i mezbûrun bi’l-külliye ebniyesi muhterik ve arsası sırfa kalmağla zikr olunduğu vech üzere menzil-i mezbûrun mülk ve vakıf olan mahallerini mûrisimiz müteveffâ-yı mûmâ-ileyh Ali Efendi’ye bey‘ ve fâriğ oldukdan sonra mûrisimiz müteveffâ-yı mûmâ-ileyh bey‘-i merkūm ve ferâğ-ı mezkûr beynlerinde kat‘î olup vefâ olmak üzere mukāvele ve temessük dahi vermiş idi. Ba‘dehû müteveffâ-yı mezbûr es-Seyyid Hasan Ağa hayatında meblağ-ı merkūmun iki bin guruşunu mûrisimiz mûmâ-ileyh Ali Efendi’ye hayatında teslîm mâ‘adâsı olan beş bin beş yüz guruşu benim ile müvekkilem mezbûreye mevrûs oldukdan sonra meblağ-ı bâkī-i mezbûr beş bin beş yüz guruşu ben bundan akdem müteveffâ-yı mezbûrun tereke-i vâfiyesinden olmak üzere huzûr-ı hâkimü’ş-şer‘de bi’l-asâle ve bi’l-vekâle verese-i mezkûreden da‘vâ ve şer‘an ba‘de’s-sübût ve’l-hükm meblağ-ı merkūm beş bin beş yüz guruşun bi-emr ve’l-kabûl bize edâsına işbu hâzır bi’l-meclis sâbıkā Selanik ağası Ebûbekir Ağa b. Abdullah’a bundan akdem kefâlet-i sahîha-i şer‘iye ile kefîl ve zâmin olduğuna binâen bin yüz elli guruşu bi-hükmi’l-kefâle bize edâ ve teslîm bâkī kalan dört bin üç yüz elli guruşun iki bin yedi yüz elli iki guruşu mukābelesinde menzil-i mezkûrun mülk olan arsa-i mezkûresinde tashîh-i mezkûr üzere sagīr-i mezbûrenin on dört sehm hisse-i mezkûresiyle mâ‘an mezbûrûnun yedlerinde mülk-i mevrûsları olan otuz dört sehm hisse-i şâyi‘alarını ber-nehc-i şer‘î takas ve mahsûb ve bana teslîm eylediklerinde ben dahi ber-minvâl-i muharrer bi’l-asâle ve bi’l-vekâle mukāssa ve tesellüm ve kabûl eylediğimde onlar dahi menzil-i mezkûrun icâre-i müctemi‘asından gerek mûrisimiz müteveffâ-yı mûmâ-ileyh Ali Efendi’nin ve gerek bizim makbûzumuz olan meblağ-ı ma‘lûmü’l-mikdâra ve sâire müte‘allika âmme-i de‘âvî ve mutâlebât ve kâffe-i eymân ve muhâsamâtdan herbirimiz âharın zimmetini ibrâ-i âmm-ı kātı‘u’n-nizâ‘ ve ıskāt-ı tamm-ı râfi‘ü’l-hisâm ile bi’l-asâle ve bi’l-vekâle ibrâ ve ıskāt edip ve herbirimiz asâleten ve vekâleten âharın ibrâsını kabûl eyledik dedikde gıbbe’t-tasdîki’ş-şer‘î mûmâ-ileyh Mehmed Râşid Efendi yine meclis-i ma‘kūd-ı mezkûrda kefîl hâzır-ı mezbûr Ebûbekir Ağa muvâcehesinde bi’l-asâle ve bi’l-vekâle i‘âde-i kelâm edip mezbûr Ebûbekir Ağa zimmetinde cihet-i kefâlet-i mezkûreden bâkī kalıp bize deyni olan bin beş yüz doksan sekiz guruşun üç yüz kırk sekiz guruşu mütâlebesinden mezbûr Ebûbekir Ağa’nın zimmetini bi’l-asâle ve bi’l-vekâle ibrâ ve ıskāt eylediğimde ol dahi ibrâ-yı mezkûru kabûl etmekle mâ‘adâsı olup bâkī kalan bin iki yüz elli guruşu mezbûr Ebûbekir Ağa’nın hâlâ edâya iktidârı olmayıp ber-vech-i âtî tecîle tâlib olmağla ben dahi meblağ-ı bâkī-i merkūm bin iki yüz elli guruşu işbu târih-i kitâbdan on sekiz ay tamamında bana def‘aten edâ ve teslîm etmek üzere mezbûr Ebûbekir Ağa’yı bi’l-asâle ve bi’l-vekâle tecîl eyledim dedikde ol dahi deyn-i mezkûru ikrâr ve ecel-i merkūmu kabûl ve meblağ-ı bâkī-i merkūm bin iki yüz elli guruşu müddet-i mezkûre tamamında mûmâ-ileyh Mehmed Râşid Efendi’ye tamamen edâ ve teslîme ta‘ahhüd etmeğin mâ-vaka‘a bi’t-taleb ketb olundu. Fi’l-yevmi’s-sâmin Ra sene 1197 Şühûdü’l-hâl: Umdetü’l-müderrisîn zübdetü’l-mehâdîmi’l-fihâm Kebçecizâde Mehmed Salih Efendi, Mevâlî-i i‘zâmdan sâbıkā Kayseriye kadısı Şeyhzâde Sunullah Efendi, Fahrü’l-eimme es-Seyyid Osman Efendi b. es-Seyyid Ahmed, Molla Abdürrezzak b. Derviş İbrahim, Uncuzâde Mehmed Emin Efendi b. Ahmed Efendi ve gayruhum.>>