Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 278 Hüküm no: 283 Orijinal metin no: [40b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Defterdar Ahmed Çelebi mahallesinden Yahya Efendi’nin yarım ev hissesini Zeliha bt. Ali’ye bey‘ bi’l-vefâ yoluyla satması Nısf mübâya‘a-i menzil bey‘ bi’l-vefâ ile Mahmiye-i İslâmbol’da Defterdâr Ahmed Çelebi mahallesinde sâkin Yahya Efendi b. Ahmed meclis-i şer‘-i şerîf-i enverde işbu bâ‘isetü’l-kitâb Zeliha bt. Ali nâm hatun tarafından vech-i âtî üzere tasdîka vekîl olduğu ber-nehc-i şer‘î sâbit olan Molla Ali b. Halil nâm kimesne mahzarında ikrâr ve takrîr-i kelâm edip mahalle-i mezbûrede vâki‘ bir tarafdan es-Seyyid Mehmed arsası ve bir tarafdan Esîrî Süleyman arsası ve bir tarafdan Hadice Hatun arsası ve bir tarafdan tarîk-i âm ile mahdûd bir tahtânî oda ve bir sofa ve bir mikdâr bağçeyi müştemil bir bâb menzilin arsası Devâtdâr Mehmed Efendi nâm sâhibü’l-hayrın mescid-i şerîfi imâmlarına yevmî bir akçe mukāta‘alı ve üzerinde olan bi’l-cümle ebniyesinin nısf-ı şâyi‘i Hadice bt. Salih nâm hatunun ve nısf-ı şâyi‘-i âharı dahi benim yedimizde mülk ve hakkımız olmağın ben ber-vech-i muharrer mâlik olduğum ebniyenin nısf-ı şâyi‘ini târih-i kitâbdan bir sene tamamına değin istirdâd-ı semen ve teslîm-i mebî‘ etmek üzere bey‘ bi’l-vefâ tarîkiyle müvekkile-i mezbûre Zeliha Hatun’a altmış yedi buçuk guruşa bey‘ ve teslîm ve nısf arsasını dahi bâ-ma‘rifet-i mütevellî meccânen ferâğ ve tefvîz eylediğimde ol dahi ber-vech-i muharrer iştirâ ve tesellüm ve tefevvüz ve kabûl eyledikden sonra meblağ-ı mezbûr altmış yedi buçuk guruşu müvekkile-i mezbûre Zeliha Hatun yedinden tamamen ahz ü kabz eyledim dedikde gıbbe’t-tasdîki’ş-şer‘î mâ-vaka‘a. Fî 16 Ra sene 1197 Şühûdü’l-hâl: Es-Seyyid Osman Efendi b. es-Seyyid Mehmed, es-Seyyid Mehmed Said b. es-Seyyid Mehmed, el-Hâc Halil b. Abdullah, Süleyman Ağa b. Ahmed, İbrahim Ağa b. Ahmed ve gayruhum.