Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 284 Hüküm no: 290 Orijinal metin no: [41b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İlyaszade mahallesinden Şerife Ayşe Hatun’un kocasından boşanması Muhâla‘a Mahmiye-i İslâmbol hısnı ebvâbından Topkapı hâricinde İlyaszâde mahallesinde sâkine ve zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan Şerife Âişe Hatun bt. es-Seyyid Ömer meclis-i şer‘-i hatîr-i lâzımü’t-tevkīrde zevc-i dâhili işbu bâ‘isü’l-kitâb İsmail b. Ali nâm kimesne mahzarında ikrâr ve takrîr-i kelâm edip mezbûr İsmail zevcim olup lâkin beynimizde hüsn-i mu‘âşeretimiz olmayıp ben hul‘a tâlibe olduğum ecilden zevcim mezbûrun zimmetinde mütekarrer ve ma‘kūdun-aleyh olan yetmiş beş guruş mehr-i müeccelim ve nafaka-i iddet-i ma‘lûmem üzerlerine ve meûnet-i süknâm dahi kendi üzerime olup zevcim mezbûra mâlımdan medfû‘um olan on bir guruş dahi bedel-i hul‘ olmak üzere zevcim mezbûr İsmail ile muhâla‘a-i sahîha-i şer‘iye ile hul‘ olduğumda ol dahi ber-vech-i muharrer hul‘-ı mezbûru ba‘de’l-kabûl hukūk-ı zevciyete ve ibtidâ-i zevciyetden târih-i kitâba gelince bi’l-cümle hukūk-ı sâireye müte‘allika âmme-i de‘âvî ve kâffe-i mutâlebâtdan zevcim mezbûr İsmail’in zimmetini ibrâ-i âm ile ibrâ ve ıskāt eylediğimde ol dahi kezâlik hukūk-ı zevciyete ve benden matlûbu olan seksen üç guruş kıymetli on altı miskāl bir çift altın bileziğe ve bi’l-cümle hukūk-ı sâire müte‘allika âmme-i de‘âvîden benim zimmetimi ibrâ ve ıskāt edip herbirimiz ber-minvâl-i muharrer âharın ibrâsını kabûl eyledik dedikde gıbbe’t-tasdîki’ş-şer‘î mâ-vaka‘a bi’t-taleb. Fî 19 Rebî‘ülevvel sene 1197 Şühûdü’l-hâl: Ebûbekir Beşe b. Mehmed, Veliyüddin b. Ali, Molla Ali b. Halil, Salih b. Halil, Molla Mehmed b. Mustafa, Hacı Hasan b. Osman, Ali Ağa b. Mehmed Çukadâr ve gayruhum.