Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 285 Hüküm no: 291 Orijinal metin no: [42a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Evliya mahallesinden Toparabacı çorbacılarından İbrahim Ağa’nın vârislerinin tereke paylaşımı konusunda sulh olmaları Terekeyi ahz ü kabz Mahmiye-i İslâmbol’da Mevlevîhâne Yenikapısı dâhilinde el-Hâc Evliyâ mahallesinde sâkin iken bundan akdem vefât eden Toparabacı çorbacılarından İbrahim Ağa b. Mustafa nâm kimesnenin verâseti zevce-i metrûkesi Fatıma bt. Abdullah nâm hatun ile li-ebeveyn er karındaşı oğlunun oğlu Mustafa b. Ali nâm sagīr ile âhar li-ebeveyn er karındaşı oğlunun oğlu Mehmed Emin b. Halil nâm sagīre münhasıra ve mesele-i mîrâsları sekiz sehm i‘tibârıyla iki sehmi zevcesi mezbûre Fatıma Hatun’a ve üçer sehmden cem‘an altı sehmi sagīrân-ı mezbûrân Mustafa ve Mehmed Emin’den herbirine isâbeti lede’ş-şer‘i’l-enver zâhir oldukdan sonra sagīr-i mezbûr Mehmed Emin’in vâlidesi ve tesviye-i emrine bâ-hüccet-i şer‘iye vasîyy-i mansûbesi olan diğer Fatıma bt. Ali nâm hatun tarafından ber-vech-i âtî vekîl olduğu zât-ı mezbûreyi ârifân el-Hâc Mehmed Ağa b. Abdullah ve Ahmed Beşe b. Salih nâm kimesneler şehâdetleriyle şer‘an sâbit olan Mustafa Ağa b. Hüseyin nâm kimesne meclis-i şer‘-i şerîf-i enverde tereke-i müteveffâ-yı mezbûra bi’l-verâse vâzı‘atü’l-yed olan işbu bâ‘isetü’l-kitâb mezbûre Fatıma Hatun mahzarında bi’l-vekâle ikrâr ve takrîr-i kelâm edip müvekkilem mezbûre diğer Fatıma Hatun vasîsi olduğu sagīr-i mezbûrun mûrisi müteveffâ-yı mezbûrun terekesi bâ-ma‘rifet-i şer‘ tahrîr ve defter-i kassâm olunup herbiri hisse-i irsiyelerini ahz ü kabz edip lâkin mezbûre Fatıma Hatun müteveffâ-yı mezbûrun terekesinden hâric ez-defter-i kassâm bir çift altın bilezik ve bir sîm pandül sâ‘atini ketm u ihfâ etmekle sagīr-i mezbûrun hissesini vâlidesi müvekkilem mezbûre diğer Fatıma Hatun mezbûre Fatıma Hatun’dan bu esnâda taleb ve da‘vâ eylediğinde ol dahi bi’l-külliye inkâr edip müvekkilem mezbûre diğer Fatıma Hatun dahi müdde‘âsını isbât edemeyip mezbûre Fatıma Hatun’un yemîn edeceği mütehakkık olmağın beynlerine muslihûn tavassutuyla müvekkilem mezbûre diğer Fatıma Hatun’u ber-vech-i muharrer tesaddî eylediği da‘vâ-yı mezkûresinden mezbûre Fatıma Hatun ile an-inkâr otuz guruş üzerine inşâ-i akd-i sulh eylediklerinde ol dahi sulh-ı mezkûru kabûl ve bedel-i sulh olan meblağ-ı mezbûr otuz guruşu müvekkilem mezbûre diğer Fatıma Hatun mezbûre Fatıma Hatun yedinden bi’l-vesâye tamamen ahz ü kabz edip sagīr-i mezbûrun mûrisi müteveffâ-yı mezbûrun dâhil-i defter ve hâric ez-defter terekesinden mezbûre Fatıma Hatun yed ve kıbelinde bir akçe ve bir habbe bâkī kalmamışdır dedi dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 18 min-Ra sene 1197 Şühûdü’l-hâl: Melek Mustafa Ağa b. Osman, Osman Ağa b. Hasan, Hasan b. Ali, İbrahim Ağa b. Abdullah, es-Seyyid Mehmed Çavuş Ağa b. Osman, Babalızâde Mustafa Ağa b. Mehmed, el-Hâc Mehmed Ağa b. Abdullah, Molla Ali b. Halil ve gayruhum.