Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 293 Hüküm no: 301 Orijinal metin no: [43b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sarraç İshak mahallesinden Osman Çavuş’un ev arsası hissesini hanımına satması Arsa mübâya‘ası Mahmiye-i İslâmbol’da Sarrâc İshak mahallesinde sâkin kul çavuşlarından Osman Çavuş Ağa b. Abdullah nâm kimesne meclis-i şer‘-i şerîf-i enverde hâlâ zevcesi mu‘arrefetü’z-zât işbu bâ‘isetü’l-kitâb Münevvere bt. Ahmed nâm hatun mahzarında ikrâr ve takrîr-i kelâm edip akd-i âti’z-zikrin sudûruna değin bâ-hüccet-i şer‘iye yedimde mülk ve hakkım olup mahmiye-i mezbûrede Ördek Kasab mahallesinde vâki‘ iki tarafdan sâbıkā sekbânbaşı veresesi bostanı ve bir tarafdan tarîk-i âm ve bir tarafdan Ahmed Beşe veresesi arsasıyla mahdûd bir bâb mülk menzil arsasının nısf-ı şâyi‘ini yedimde ibkā ve nısf-ı şâyi‘-i âharını tarafeynden îcâb ve kabûlü hâvî bey‘-i bâtt-ı sahîh-i şer‘î ile zevcem mezbûre Münevvere Hatun’a elli guruşa bey‘ ve temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr elli guruş mütâlebesinden zevcem mezbûre Münevvere Hatun’un zimmetini ibrâ-i âmm-ı kātı‘u’n-nizâ‘la ibrâ ve ıskāt eylediğimde ol dahi ibrâmı kabûl eyledi, ba‘de’l-yevm arsa-i mahdûde-i mezkûrenin nısf-ı şâyi‘i zevcem mezbûre Münevvere Hatun’un mülk-i müşterâsı ve hakk-ı sarfı olup ancak nısf-ı şâyi‘inde benim kat‘a alâka ve medhalim kalmamışdır dedikde gıbbe’t-tasdîki’ş-şer‘î. Fî 20 min-Ra sene 1197 Şühûdü’l-hâl: el-Hâc Mustafa Kahveci b. ( ), Müezzin Molla Ahmed b. ( ), Abdi Odabaşı b. ( ), Attâr Molla Ali b. ( ) ve gayruhum.