Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 292 Hüküm no: 300 Orijinal metin no: [43a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İskender Paşa mahallesinden vefat eden Feyzullah Ağa’nın İsmail Ağa’daki alacağını vârislerin tahsil etmek istemesi İsbât-ı verâset Mahmiye-i İslâmbol’da Yeniodalar kurbünde İskender Paşa mahallesinde sâkin iken bundan akdem vefât eden Feyzullah Ağa b. el-Hâc Mustafa bin Halil’in verâseti zevce-i metrûkesi Emine bt. Süleyman nâm hatun ile sulbiye-i kebîre kızı Ümmügülsüm Hatun’a ve li-ebeveyn er karındaşı oğlu Hüseyin b. Mehmed nâm kimesneye münhasıra ve mesele-i mîrâsları sekiz sehm i‘tibârıyla bir sehmi zevcesi mezbûre Emine Hatun’a ve dört sehmi kızı mezbûre Ümmügülsüm Hatun’a ve bâkī üç sehmi mezbûr Hüseyin’e isâbeti tahakkukundan sonra zâtı ta‘rîf-i şer‘î ile mu‘arrefe olan işbu bâ‘isetü’l-kitâb mezbûre Ümmügülsüm Hatun meclis-i şer‘-i hatîr-i lâzımü’t-tevkīrde es-Seyyid İsmail Ağa b. Hasan mahzarında üzerine da‘vâ ve takrîr-i kelâm edip babam müteveffâ-yı mezbûr Feyzullah Ağa mukaddemâ hayatında işbu mezbûr es-Seyyid İsmail Ağa’ya mâlından beş guruş idâne ve teslîm ol dahi yedinden istidâne ve kabz edip meblağ-ı mezbûr beş guruşu kable’l-ahz ve’l-istifâ babam mezbûr Feyzullah Ağa fevt ve meblağ-ı mezbûr bana ve zevcesi vâlidem mezbûre Emine Hatun’a ve mezbûr Hüseyin’e isâbet etmeğin meblağ-ı mezbûr beş guruşdan ber-i‘tibâr-ı mezkûr benim hisse-i irsiyeme isâbet eden iki buçuk guruşu mezbûr es-Seyyid İsmail Ağa’dan taleb ederim, suâl olunup alıverilmesi matlûbumdur dedikde gıbbe’s-suâl mezbûr es-Seyyid İsmail Ağa cevâbında meblağ-ı mezbûr beş guruşu cihet-i mezbûreden müteveffâ-yı mezbûr Feyzullah Ağa’ya zimmetinde hâlâ deyni olduğunu ikrâr lâkin müdde‘iye-i mezbûrenin verâsetini inkâr edicek, müdde‘iye-i mezbûre Ümmügülsüm Hatun’dan ber-vech-i muharrer müdde‘âsını mübeyyine beyyine taleb olundukda udûl-ı ahrâr-ı ricâl-i Müslimînden ve mahalle-i mezbûre ahâlisinden İsmail Efendi b. İbrahim ve İbrahim b. Abdullah nâm kimesneler zât-ı mezbûreyi ârifân oldukları hâlde li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka mârrü’z-zikr İskender Paşa mahallesinde sâkin iken bundan akdem vefât eden Feyzullah Ağa b. el-Hâc Mustafa b. Halil’in verâseti zevce-i metrûkesi ve zâtı ma‘lûmumuz olan Emine bt. Süleyman nâm hatun ile sulbiye-i kebîre kızı işbu müdde‘iye-i mezbûre Ümmügülsüm Hatun’a ve li-ebeveyn er karındaşı oğlu Hüseyin b. Mehmed nâm kimesneye münhasıradır, biz bu husûsa bu vech üzere şâhidleriz, şehâdet dahi ederiz deyü herbiri bi’l-muvâcehe edâ-i şehâdet-i şer‘iye etdiklerinde gıbbe ri‘âyeti şerâiti’l-kabûl şehâdetleri makbûle olmağın mûcebiyle ba‘de’l-hükm ve’t-tenbîh mâ-vaka‘a bi’t-taleb ketb olundu. Fî 23 Rebî‘ülevvel sene 1197 Şühûdü’l-hâl: Es-Seyyid Ahmed Efendi b. Mustafa, Abdüllatif Efendi Kâtib, İsmail Efendi b. İbrahim, İbrahim b. Abdullah, Molla Ali b. Halil ve gayruhum.