Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 294 Hüküm no: 303 Orijinal metin no: [43b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Alifakih mahallesinden Afife bt. Abdullah’ın ev arsasını üvey oğlu Ahmed’e satması Arsa mübâya‘ası Mahmiye-i İslâmbol’da Ali Fakih mahallesinde sâkine ve zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan Afife bt. Abdullah nâm hatun meclis-i şer‘-i hatîr-i lâzımü’t-tevkīrde üveyi oğlu işbu bâ‘isü’l-vesîka es-Seyyid Ahmed Efendi b. el-merhûm Mehmed Çavuş mahzarında ikrâr ve takrîr-i kelâm edip akd-i âti’z-zikrin sudûruna değin bâ-hüccet-i şer‘iye şirâen yedimde mülk ve hakkım olup mahmiye-i mezbûrede Davudpaşa mahallesinde vâki‘ bir tarafdan Tezkireci Hüseyin Efendi Vakfı’ndan mezbûr es-Seyyid Ahmed Efendi ve kız karındaşı Şerife Hadice Hatun tasarruflarında olan muhterik menzil arsası ve bir tarafdan ba‘zan Emine Hatun ve ba‘zan Yağlıkçı hamamı havlusu ve bir tarafdan yine mezbûr es-Seyyid Ahmed Efendi ve mezbûre Şerife Hadice Hatun’un hâriciye ta‘bîr olunur muhterik mülk menzil arsaları ve bir tarafdan tarîk-i âm ile mahdûd derûnunda bir mahzen ve bir bi’r-i mâ ve sâir enkāz-ı mevcûde-i ma‘lûmeyi hâvî bir bâb muhterik mülk menzil arsamı tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ile mezbûr es-Seyyid Ahmed Efendi’ye iki yüz guruşa bey‘ ve temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr iki yüz guruş mütâlebesinden mezbûr es-Seyyid Ahmed Efendi’nin zimmetini ibrâ ve ıskāt eylediğimde ol dahi ibrâmı kabûl eyledi, ba‘de’l-yevm arsa-i mahdûde-i mezkûre mezbûr es-Seyyid Ahmed Efendi’nin mülk-i müşterâsı ve hakk-ı sarfı olup benim kat‘a alâka ve medhalim kalmamışdır dedikde gıbbe’t-tasdîki’ş-şer‘î mâ-vaka‘a bi’t-taleb. Fî 24 Rebî‘ülevvel sene 1197 Şühûdü’l-hâl: Es-Seyyid el-Hâc İbrahim Ağa b. Mehmed, Hafız Mustafa Efendi b. Mehmed İmâm-ı sânî-i Davudpaşa, Hüseyin Efendi b. İbrahim, Molla Ali b. Halil, Salih b. Halil, Hacı Hasan b. Osman.