Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 295 Hüküm no: 304 Orijinal metin no: [43b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Es-Seyyid Ömer mahallesinden Ahmed Beşe’nin evini Mehmed Efendi’ye satması Menzil mübâya‘ası Mahmiye-i İslâmbol’da es-Seyyid Ömer mahallesinde sâkin Ahmed Beşe b. Mahmud nâm kimesne meclis-i şer‘î- hatîr-i lâzımü’t-tevkīrde işbu bâ‘isü’l-kitâb es-Seyyid Mehmed Efendi b. es-Seyyid Mustafa mahzarında ikrâr ve takrîr-i kelâm edip akd-i âti’z-zikrin sudûruna değin bâ-hüccet-i şer‘iye şirâen yedimde mülk ve hakkım olup mahalle-i mezbûrede vâki‘ bir tarafdan Ali Çavuş arsası ve bir tarafdan Sîmkeş Habib Beşe arsası ve iki tarafdan tarîk-i âm ile mahdûd terbî‘an yüz elli zirâ‘ arsa üzerinde mebnî fevkānî bir bâb oda ve bir sofa ve tahtânî bir bâb oda ve bir matbah ve bir kenîf ve bir mikdâr havluyu müştemil bir bâb mülk menzili bi-cümleti’t-tevâbi‘ ve’l-levâhık ve kâffetü’l-hukūk ve’l-merâfık tarafeynden îcâb ve kabûlü hâvî bey‘-i bâtt-ı sahîh-i şer‘î ile mezbûr es-Seyyid Mehmed Efendi’ye iki yüz elli guruşa bey‘ ve temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr iki yüz elli guruşu mezbûr es-Seyyid Mehmed Efendi yedinden tamamen ahz ü kabz eyledim, ba‘de’l-yevm menzil-i mahdûd-ı mezkûr cemî‘ müştemilâtıyla mezbûr es-Seyyid Mehmed Efendi’nin mülk-i müşterâsı ve hakk-ı sarfı olup benim kat‘a alâka ve medhalim kalmamışdır, keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-vaka‘a. Fî 25 Ra sene 1197 Şühûdü’l-hâl: Hacı Hüseyin Efendi b. Yusuf, Hamâmî Ali Efendi b. Mehmed, Halil Efendi b. Mehmed, Osman Odabaşı b. İbrahim, Hüseyin Ağa b. İbrahim, Molla Ali b. Halil, Salih b. Halil ve gayruhum.