Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 299 Hüküm no: 310 Orijinal metin no: [44b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Canbaziye mahallesinden Kosta v. Manol ve Karagöz v. Paskal’ın ortak oldukları bakkal dükkânını Hasan Ağa’ya satmaları Gedik mübâya‘ası Mahmiye-i İslâmbol’da Avratpazarı kurbünde Canbaziye mahallesinde mütemekkinler Bakkāl Kosta v. Manol ve Karagöz v. Paskal nâm zimmîler meclis-i şer‘-i şerîf-i enverde işbu bâ‘isü’l-vesîka Hasan Ağa b. Abdullah nâm kimesne mahzarında herbiri ikrâr ve takrîr-i kelâm edip mahalle-i mezbûrede vâki‘ bir bâb bakkāl dükkânı derûnunda mevcûd beyne’l-hıref gedik ta‘bîr olunur iki kantar ve altı fıçı ve iki terâzî ma‘a derâhim ve bir peştahta ve bir destgâh ve iki tencere ve dört sahan ve bir tâbe ve sâir âlât-ı lâzıme-i ma‘lûme bi’l-münâsafa yedimizde mülkümüz olmağın biz dükkân-ı mezkûrda ber-vech-i muharrer mâlik olduğumuz eşyâ ve sâir âlât-ı lâzıme-i ma‘lûmemizi tarafeynden îcâb ve kabûlü hâvî bey‘-i bâtt-ı sahîh-i şer‘î ve safka-i vâhide ile mezbûr Hasan Ağa’ya altı yüz guruşa bey‘ ve temlik ve vech-i lâyıkı üzere teslîm eylediğimizde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr altı yüz guruşu mezbûr Hasan Ağa yedinden [bi’l]-münâsafa tamamen ahz ü kabz eyledik, ba‘de’l-yevm dükkân-ı mezkûrda gedik ta‘bîr olunan eşyâ ve sâir âlât-ı lâzıme-i ma‘lûme mezbûr Hasan Ağa’nın mülk-i müşterâsı olmuşdur dediklerinde gıbbe’t-tasdîki’ş-şer‘î mâ-vaka‘a. Fî 27 Ra sene 1197 Şühûdü’l-hâl: el-Hâc İsmail Efendi b. Ahmed Müezzin-i Kürkçübaşı, Mehmed Tâhir Efendi b. Abdulkadir, Derviş Mehmed, Derviş İbrahim, Molla Ali b. Halil, Salih b. Halil.