Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 298 Hüküm no: 309 Orijinal metin no: [44a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Melek Hatun mahallesinden Şerife Emetullah’ın bakmakta olduğu küçük kızı için kendisini boşayan kocasından nafaka alması Nafaka-i sagīre Mahmiye-i İslâmbol’da Mevlevîhâne Yenikapısı dâhilinde Melek Hatun mahallesinde sâkine ve zâtı vech-i şer‘î üzere mu‘arrefe olan işbu bâ‘isetü’l-kitâb Şerife Emetullah bt. Mustafa nâm hatun meclis-i şer‘-i şerîf-i enverde zevc-i mutallıkı Mehmed Said Beşe b. Mustafa nâm kimesne mahzarında takrîr-i kelâm ve bast-ı merâm edip zevc-i mutallıkım mezbûr Mehmed Said Beşe’nin firâşından hâsıla ve benden mütevellide ve hâlâ bi-hakkı’l-hıdâne hacr u terbiyemde olan sadriye kızım Şerife Hadice nâm sagīrenin mâlı olmayıp nafaka ve kisveye ihtiyâcı olmağla kızım sagīre-i mezbûrenin nafaka ve kisve-bahâsı içün babası mezbûr Mehmed Said Beşe üzerine kıbel-i şer‘den kadr-ı ma‘rûf meblağ farz ve takdîr olunmak bi’l-hıdâne matlûbumdur dedikde gıbbe’t-tasdîki’ş-şer‘î hâkim-i muvakkı‘-ı sadr-ı kitâb -tûbâ-lehû ve hüsnü-meâb- efendi hazretleri dahi sagīre-i mezbûrenin ber-vech-i muharrer nafaka ve kisve-bahâsı içün babası mezbûr Mehmed Said Beşe üzerine bi’t-terâzî târih-i kitâbdan küllü yevm sekizer akçe farz ve takdîr edip [44b] meblağ-ı mefrûz-ı mezkûru sagīre-i mezbûrenin nafaka ve kisvesine harc ü sarfa ve lede’l-iktizâ istidâneye ve inde’z-zafer babası mezbûr Mehmed Said Beşe üzerine rücû‘a mezbûre Şerife Emetullah Hatun’a izin vermeğin mâ-vaka‘a bi’t-taleb. Fî 27 Ra sene 1197 Şühûdü’l-hâl: Şâhidûn-ı sâbıkūn.