Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 363 Hüküm no: 390 Orijinal metin no: [56b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dörtdivan nahiyesi Evrece köyünden Meryem Hatun ile Ahmed Beşe’nin boşandıkları Muhâla‘a, vekâleten, Anadolu’dan Vilâyet-i Anadolu’da Bolu kazâsı nevâhîsinden Dörtdivan nâhiyesine tâbi‘ Evrece? nâm karyede sâkine Meryem bt. Ali b. Abdurrahman nâm hatun tarafından ber-vech-i âtî hul‘ ve ibrâya vekîl olduğu zât-ı mezbûreyi ârifân karye-i mezbûre sâkinlerinden Süleyman b. Mustafa ve İbrahim b. Ali nâm kimesneler şehâdetleriyle şer‘an sâbit ve sübût-ı vekâletine hükm-i şer‘î lâhık olan li-ebeveyn er karındaşı Ali Beşe b. el-mezbûr Ali nâm kimesne meclis-i şer‘-i hatîr-i lâzımü’t-tevkīrde müvekkile-i mezbûrenin zevc-i dâhili işbu bâ‘isü’l-kitâb Ahmed Beşe b. İbrahim nâm kimesne mahzarında bi’l-vekâle ikrâr ve takrîr-i kelâm edip kız karındaşım müvekkilem mezbûre Meryem Hatun’un zevci mezbûr Ahmed Beşe ile beynlerinde hüsn-i imtizâcları olmayıp kız karındaşım müvekkile-i mezbûre hul‘a tâlibe olduğu ecilden zevci mezbûrun zimmetinde mütekarrer ve ma‘kūdun-aleyh olan on beş bin mehr-i müecceli ve nafaka-i iddet-i ma‘lûmesi üzerlerine ve meûnet-i süknâsı kız karındaşım müvekkile-i mezbûre Meryem Hatun’un kendi üzerine olmak üzere zevci mezbûr Ahmed Beşe ile muhâla‘a-i sahîha-i şer‘iye ile bi’l-vekâle hul‘ eylediğimde ol dahi ber-vech-i muharrer hul‘-ı mezbûru ba‘de’l-kabûl hukūk-ı zevciyete müte‘allika âmme-i de‘âvî ve kâffe-i mutâlebâtdan ben bi’l-vekâle mezbûr Ahmed Beşe’nin zimmetini ibrâ ve ıskāt eylediğimde ol dahi kezâlik hukūk-ı zevciyete müte‘allika âmme-i de‘âvîden kız karındaşım müvekkilem mezbûre Meryem Hatun’un zimmetini ibrâ ve ıskāt edip her birimiz ber-minvâl-i muharrer bi’l-asâle ve bi’l-vekâle âharın ibrâsını kabûl eyledik dedikde gıbbe’t-tasdîki’ş-şer‘î mâ-vaka‘a. Fî 27 R sene 1197 Şühûdü’l-hâl: Süleyman b. Mustafa, İbrahim b. Ali, Serdâroğlu Hasan, Nadaroğlu Hüseyin, Halil Beşe câbî kadîmen, Molla Ali b. Halil.