Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 363 Hüküm no: 391 Orijinal metin no: [56b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Alifakih mahallesinden Saide bt. Ahmed’in bazı eşyalarını annesi Emine’ye sattığı Eşyâ mübâya‘ası Mahmiye-i İslâmbol’da Ali Fakih mahallesinde sâkine ve zâtı vech-i şer‘î üzere mu‘arrefe olan Saide bt. Ahmed nâm hatun meclis-i şer‘-i şerîf-i enverde vâlidesi olup kezâlik zâtı vech-i şer‘î üzere mu‘arrefe olan işbu bâ‘isetü’l-kitâb Emine bt. İbrahim nâm hatun mahzarında ikrâr ve takrîr-i kelâm edip eşyâ-i memlûkemden kıtık memlû dört şayak yasdık ve iki minder ve bir döşek ma‘a çârşeb ve bir yemeni baş yasdığı ve bir yorgan bâ-çârşeb ve bir orta keçesi ve iki yemeni mak‘ad ve bir gezi hırka ve bir şali entari ve bir çuka ferâce ve dört sahan ma‘a kapak ve iki tencere ma‘a kapak ve bir hamam tası ve bir şorba tası ve bir leğen ma‘a ibrik ve bir sini ve bir tepsi ve bir şamdan ve bir tâbe ve bir sepet sandığı tarafeynden îcâb ve kabûlü hâvî bey‘-i bâtt-ı sahîh-i şer‘î ve safka-i vâhide ile vâlidem mezbûre Emine Hatun’a yirmi guruşa bey‘ ve temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr yirmi guruş mutâlebesinden vâlidem mezbûre Emine Hatun’un zimmetini ibrâ ve ıskāt eylediğimde ol dahi ibrâmı kabûl eyledi, ba‘de’l-yevm eşyâ-i muharrere-i mezkûre vâlidem mezbûre Emine Hatun’un mülk-i müşterâsı ve hakk-ı sarfı olup benim kat‘a alâka ve medhalim kalmamışdır dedikde gıbbe’t-tasdîki’ş-şer‘î mâ-vaka‘a bi’t-taleb. Fî 25 R sene 1197 Şühûdü’l-hâl: Kahveci Mehmed Ağa b. ( ), Papuşcu Süleyman Beşe b. ( ), Molla Ali b. Halil, Salih b. Halil.