Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 367 Hüküm no: 396 Orijinal metin no: [57b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Cafer Ağa mahallesinden Şerife Ayşe Hatun ile Mehmed b. İsmail’in boşandıkları Muhâla‘a Mahmiye-i İslâmbol’da Cafer Ağa mahallesinde sâkine ve zâtı vech-i şer‘î üzere mu‘arrefe olan Şerife Âişe Hatun bt. es-Seyyid Musa meclis-i şer‘-i şerîf-i enverde zevc-i dâhili işbu bâ‘isü’l-kitâb es-Seyyid Mehmed b. İsmail nâm kimesne mahzarında ikrâr ve takrîr-i kelâm edip mezbûr es-Seyyid Mehmed zevcim olup lâkin beynimizde hüsn-i mu‘âşeretimiz olmamağla zimmetinde mütekarrer ve ma‘kūdun-aleyh olan yirmi guruş mehr-i müeccelim ve nafaka-i iddet-i ma‘lûmem üzerlerine ve meûnet-i süknâm dahi kendi üzerime olup ve zevcim mezbûra mâlımdan medfû‘um olan seksen sekiz para dahi bedel-i hul‘ olmak üzere zevcim mezbûr es-Seyyid Mehmed ile muhâla‘a-i sahîha-i şer‘iye ile hul‘ olduğumda ol dahi ber-vech-i muharrer hul‘-ı mezbûru ba‘de’l-kabûl hukūk-ı zevciyete müte‘allika âmme-i de‘âvî ve kâffe-i mutâlebâtdan her birimiz âharın zimmetini ibrâ ve ıskāt edip her birimiz ber-minvâl-i muharrer âharın ibrâsını kabûl eyledik dedikde gıbbe’t-tasdîki’ş-şer‘î mâ-vaka‘a. Fî-gurreti Cumâdelûlâ sene 1197 Şühûdü’l-hâl: Mustafa b. Mehmed Hacı Hasan b. Osman, Salih b. Halil, İbrahim b. Salih, Molla Ali b. Halil.