Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 366 Hüküm no: 395 Orijinal metin no: [57a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sinanpaşa mahallesinden Şerife Ümmügülsüm’ün tasarruf ettiği evin yarı hissesini kardeşi Abdullah Ağa’ya sattığı Yine nısf menzil mübâya‘ası Mahmiye-i İslâmbol’da Yenibahçe kurbünde Sinanpaşa mahallesinde sâkine ve zâtı vech-i şer‘î üzere mu‘arrefe olan Şerife Ümmügülsüm bt. es-Seyyid Halil nâm hatun meclis-i şer‘-i şerîf-i enverde li-ebeveyn er karındaşı işbu bâ‘isü’l-kitâb es-Seyyid Abdullah Ağa tarafından husûs-ı âti’l-beyânı tasdîka vekîl olduğu nehc-i şer‘î ve tarîk-i mer‘î üzere sâbit olan Mustafa b. Mustafa nâm kimesne mahzarında ikrâr ve takrîr-i kelâm edip mahalle-i mezbûrede vâki‘ bir tarafdan zevcim es-Seyyid Mehmed Ağa tasarrufunda olan arsa ve bir tarafdan Hafize Hatun ve ba‘zan Nuh Halîfe menzilleri ve bir tarafdan Yenibahçe çayırı ve bir tarafdan tarîk-i hâs ile mahdûd fevkānî iki bâb oda ve bir sofa ve kenîf ve âbdesthâne ve tahtânî bir bâb oda ve sofa ve matbah ve bi’r-i mâ ve havlu ve zevcim mezbûr es-Seyyid Mehmed tarafından mâ‘adâ üç tarafdan taş duvar ve iki sokak kapısını müştemil bir bâb mülk menzilin nısf-ı şâyi‘i zevcim mezbûr es-Seyyid Mehmed’in ve nısf-ı şâyi‘-i âharı dahi bizim yedimizde [57b] şirâen mülkümüz olmağın ben menzil-i mahdûd-ı mezkûrda ber-vech-i muharrer mâlike olduğum nısf hisse-i şâyi‘amı tarafeynden îcâb ve kabûlü hâvî bey‘-i bâtt-ı sahîh-i şer‘î ile karındaşım müvekkil-i mezbûr es-Seyyid Abdullah Ağa’ya yüz elli guruşa bey‘ ve temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr yüz elli guruş mutâlebesinden karındaşım müvekkil-i mezbûr es-Seyyid Abdullah Ağa’nın zimmetini ibrâ ve ıskāt eylediğimde ol dahi ibrâyı kabûl eyledi, ba‘de’l-yevm menzil-i mahdûd mezkûrun nısf-ı şâyi‘inde benim kat‘a alâka ve medhalim kalmayıp karındaşım müvekkil-i mezbûr es-Seyyid Abdullah Ağa’nın mülk-i müşterâsı ve hakk-ı sarfı olmuşdur dedikde gıbbe’t-tasdîki’ş-şer‘î mâ-vaka‘a. Fî 29 R sene 1197 Şühûdü’l-hâl: Mütevellî Hüseyin Efendi, Tulumbacı Hüseyin Ağa, Yorganî es-Seyyid Halil Ağa, Yorganî el-Hâc Mustafa, Hasan Ağa b. ( ), Ömer Bey b. ( ), Molla Ali b. Halil ve gayruhum.