Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 368 Hüküm no: 398 Orijinal metin no: [57b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahimpaşa mahallesinden Ayşe bt. Mehmed’in bir kısım eşyasını kız kardeşi Hanife’ye sattığı Eşyâ mübâya‘ası Mahmiye-i İslâmbol’da Silivrikapısı dâhilinde İbrahim Paşa mahallesinde sâkine Âişe Hatun bt. el-Hâc Mehmed tarafından husûs-ı âti’l-beyânı ikrâra vekîl olduğu zâtını ârifân es-Seyyid Mustafa b. Osman ve es-Seyyid Ali b. Osman nâm kimesneler şehâdetleriyle şer‘an sâbit olan el-Hâc Mustafa Ağa b. İbrahim nâm kimesne meclis-i şer‘-i hatîr-i lâzımü’t-tevkīrde müvekkile-i mezbûrenin li-ebeveyn kız karındaşı mu‘arrefetü’z-zât işbu bâ‘isetü’l-kitâb Hanife Hatun mahzarında bi’l-vekâle ikrâr ve takrîr-i kelâm edip müvekkilim mezbûre Âişe Hatun eşyâ-i memlûkesinden bâ-defter-i müfredât kıtık memlû beş beledî yasdık ve üç minder ve bir orta keçesi ve üç yemeni yorgan ve iki tencere bâ-kapak ve beş sahan ve bir tâbe ve bir sini ve iki tepsi ve yedi tahta ve yedi sepet iki sandığını tarafeynden îcâb ve kabûlü hâvî bey‘-i bâtt-ı sahîh-i şer‘î ve safka-i vâhide ile kız karındaşı mezbûre Hanife Hatun’a yirmi guruşa bey‘ ve temlik ve teslîm eylediğinde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr yirmi guruş mutâlebesinden müvekkilem mezbûre Âişe Hatun kız karındaşı mezbûre Hanife Hatun’un zimmetini ibrâ ve ıskāt eylediğinde ol dahi ibrâsını kabûl eyledi, ba‘de’l-yevm eşyâ-i muharrere-i mezkûre mezbûre Hanife Hatun’un mülk-i müşterâsı ve hakk-ı sarfı olup müvekkilem mezbûre Âişe Hatun’un kat‘a alâka ve medhali kalmamışdır dedikde gıbbe’t-tasdîki’ş-şer‘î mâ-vaka‘a bi’t-taleb. Fî 2 Ca sene 1197 Şühûdü’l-hâl: Es-Seyyid Abdullah b. Osman, es-Seyyid Mehmed b. Abdullah, Bekçi es-Seyyid Hasan b. Ali, es-Seyyid Mustafa b. Osman, es-Seyyid Ali b. Osman, Molla Ali b. Halil, Salih b. Halil.