Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 369 Hüküm no: 399 Orijinal metin no: [57b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun’un Ahmed b. Mustafa’daki alacağını affettiği ve kalan malların harcı hususunda da kendisini vasi tayin ettiği Mukaddemâ alacak hakkının bir mikdârını hibe ba‘dehû vasiyet Kezâlik meclis-i şer‘-i hatîr-i lâzımü’t-tevkīrde müvekkile-i mezbûrenin li-ebeveyn er karındaşı kızının sadrî kebîr oğlu işbu bâ‘isü’l-kitâb es-Seyyid Ahmed b. Mustafa nâm kimesne mahzarında bi’l-vekâle ikrâr ve takrîr-i kelâm edip müvekkilem mezbûre Âişe Hatun’un mezbûr es-Seyyid Ahmed zimmetinde cihet-i karzdan bâ-temessük üç yüz elli guruş alacak hakkı olmağla meblağ-ı mezbûr üç yüz elli guruşun yüz elli guruşunu hibetü’d-deyn mimmen aleyhi’d-deyn sahîhatün fehvâsınca mezbûr es-Seyyid Ahmed’e hibe ve temlik eylediğinde ol dahi ber-vech-i muharrer meclis-i hibede bilâ-mâni‘ ittihâb ve temellük ve kabûl etmeğin ol-vechile deyn-i meblağ-ı mezbûr üç yüz elli guruşun yüz elli guruşundan mezbûr es-Seyyid Ahmed’in zimmeti berî oldukdan sonra müvekkilem mezbûre Âişe Hatun şöyle vasiyet eyledi ki ben bi-emrillâhi te‘âlâ vefât eylediğimde mezbûr es-Seyyid Ahmed benim vasîyy-i muhtârım olup [58b] bi’l-cümle tereke ve zimem-i nâsda olan hukūkumu bi’l-vesâye ahz ü kabz eyledikden sonra evvelâ vech-i mesnûn üzere techîz ve tekfîn ve sâir levâzım-ı defnim umûruna terekemden kırk guruş harc u sarf edip bâkī kalan terekemin sülüsünü ifrâz ve sülüs-i mezbûrdan otuz guruş ıskāt-ı salât-ı fâite ve keffârâtım içün fukarâ-i Müslimîn beyninde devr ve tasadduk eyleye ve yine sülüs-i mezbûrdan beş guruş ile iki aded taş iştirâ ve alâmet içün merkadimin baş ve ayak câniblerine vaz‘ etdire ve sülüs-i mezbûrdan her ne fazla kalır ise vasîyy-i mezbûr kendi re’yi üzere vücûh-ı birre harc ü sarf eyleye ve sülüsân-ı bâkıyemi dahi li-ebeveyn kız karındaşım Hanife Hatun ile âhar li-ebeveyn er karındaşım oğlu Mehmed b. Lütfullah beynlerinde alâ mâ-farazallâh tevzî‘ ve taksîm eyleyeler deyü vasiyet ve tenfîzinden mezbûr es-Seyyid Ahmed’i vasîyy-i muhtâr nasb ve ta‘yîn eyledim dedi dedikde ol dahi ber-minvâl-i muharrer vesâyet-i mezkûreyi kabûl ve merâsimini kemâ-yenbagī edâya ta‘ahhüd ve iltizâm etmeğin mâ-vaka‘a bi’t-taleb. Fî 2 Ca sene 1197 Eş-şâhidûnü’s-sâbıkūn.