Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 377 Hüküm no: 409 Orijinal metin no: [59a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Simkeş mahallesinden Zübeyde bt. Mehmed ile Mehmed Reşid’in boşandıkları Muhâla‘a-i ale’l-haml Mahmiye-i İslâmbol’da Mevlevîhâne Yenikapısı dâhilinde Sîmkeş mahallesinde sâkine ve zâtı ta‘rîf-i şer‘î ile mu‘arrefe olan Zübeyde bt. Mehmed nâm hatun meclis-i şer‘-i şerîf-i enverde zevc-i dâhili işbu bâ‘isü’l-kitâb es-Seyyid Mehmed Reşid b. es-Seyyid Mehmed nâm kimesne mahzarında ikrâr ve takrîr-i kelâm edip mezbûr es-Seyyid Mehmed Reşid zevcim olup lâkin beynimizde hüsn-i mu‘âşeretimiz olmayıp ben hul‘a tâlibe olduğum ecilden zevcim mezbûrun zimmetinde mütekarrer ve ma‘kūdun-aleyh olan on iki guruş mehr-i müeccelim ve zevcim mezbûrun firâşından hâsıl hamlim olmağla vaz‘-ı haml ile iddetim münkaziye oluncaya değin nafaka-i hamlim üzerlerine ve meûnet-i süknâm dahi kendi üzerime olup ve zevcim mezbûre mâlımdan medfû‘um olan kırk altı para dahi bedel-i hul‘ olmak üzere zevcim mezbûr es-Seyyid Mehmed Reşid ile muhâla‘a-i sahîha-i şer‘iye ile hul‘ olduğumda ol dahi ber-vech-i muharrer hul‘-ı mezbûru ba‘de’l-kabûl hukūk-ı zevciyete müte‘allika âmme-i de‘âvî ve kâffe-i mutâlebâtdan ben zevcim mezbûr es-Seyyid Mehmed Reşid’in zimmetini ibrâ ve ıskāt eylediğimde ol dahi kezâlik hukūk-ı zevciyete müte‘allika âmme-i de‘âvîden benim zimmetimi ibrâ ve ıskāt edip her birimiz ber-minvâl-i muharrer âharın ibrâsını kabûl eyledik dedikde gıbbe’t-tasdîki’ş-şer‘î mâ-vaka‘a. Fî 6 Ca sene 1197 Şühûdü’l-hâl: Süleyman Beşe b. İbrahim, Ahmed b. Mehmed, el-Hâc Hasan b. Osman, Molla Ali b. Halil, Salih b. Halil.