Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 376 Hüküm no: 408 Orijinal metin no: [59a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahimpaşa mahallesinden Şerife Hafize ile Şerif Mehmed Efendi’nin boşandıkları Şerif’in tatlîki Mahmiye-i İslâmbol’da Silivrikapısı dâhilinde İbrahim Paşa mahallesinde sâkine ve zâtı vech-i şer‘î üzere mu‘arrefe olan Şerife Hafize bt. es-Seyyid İbrahim nâm hatun meclis-i şer‘-i hatîr-i lâzımü’t-tevkīrde zevc-i mutallıkı işbu bâ‘isü’l-kitâb Şerif Mehmed Efendi b. Şerif Baz? tarafından husûs-ı âti’l-beyânda vekîl olduğu Abdullah Ağa b. Abdullah ve Mehmed Beşe b. Abdullah şehâdetleriyle şer‘an sâbit olan es-Seyyid Mehmed Efendi b. es-Seyyid el-Hâc Hasan mahzarında ikrâr ve takrîr-i kelâm edip müvekkil-i mezbûr Şerif Mehmed Efendi zevc-i dâhilim olduğu hâlde târih-i kitâb günü beni tatlîk etmekle zimmetinde ma‘kūdun-aleyh olan elli guruş mehr-i müeccelim ile nafaka-i iddet-i ma‘lûme ve meûnet-i süknâm içün bi’t-terâzî beynimizde ta‘yîn olunan on guruş ki cem‘an altmış guruşu zevc-i mutallıkım mezbûrun mâlından olmak üzere vekîl-i mezbûr es-Seyyid Mehmed Efendi bana işbu meclis-i şer‘de def‘ ve teslîm eyledikde ben dahi yedinden tamamen ahz ü kabz edip hukūk-ı zevciyete müte‘allika âmme-i de‘âvî ve kâffe-i mutâlebâtdan ben zevc-i mutallıkım mezbûr Şerif Mehmed Efendi’nin zimmetini ibrâ ve ıskāt eylediğimde vekîl-i mezbûr es-Seyyid Mehmed Efendi dahi kezâlik hukūk-ı zevciyete müte‘allika âmme-i de‘âvîden benim zimmetimi ibrâ ve ıskāt edip her birimiz ber-minvâl-i muharrer bi’l-asâle ve bi’l-vekâle âharın ibrâsını kabûl eyledik dedikde gıbbe’t-tasdîki’ş-şer‘î mâ-vaka‘a bi’t-taleb. Fî 6 Ca sene 1197 Şühûdü’l-hâl: Abdullah Ağa b. Abdullah, Mehmed Beşe b. Abdullah, Molla Ali b. Halil, es-Seyyid İbrahim Beşe b. ( ).