Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 378 Hüküm no: 411 Orijinal metin no: [59b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İskenderağa mahallesinden Hanife Hatun ile Ömer Efendi arasındaki vakıf menzil davasına sulh bedeli karşılığı son verildiği Vakıf menzilden sulh ve ibrâ Mahmiye-i İslâmbol’da İskender Ağa mahallesinde sâkin iken bundan akdem vefât eden es-Seyyid Mustafa b. es-Seyyid Mehmed’in sulbiye kebîre kızı ve hasran vârisesi mu‘arrefetü’z-zât Hanife nâm hatun meclis-i şer‘-i hatîr-i lâzımü’t-tevkīrde bâ‘is-i hâze’l-kitâbi’l-müstetâb sâbıkā Üsküdar kadısı umdetü’l-mevâli’l-izâm Ömer Efendi b. Ali tarafından husûs-ı âti’l-beyânı tasdîka vekîl olduğu ber-nehc-i şer‘î sâbit olan Ali Efendi b. Hüseyin mahzarında ikrâr ve takrîr-i kelâm edip babam mûrisim müteveffâ-yı mezbûrun hayatında bi’l-icâreteyn taht-ı tasarrufunda olup merhûme Âişe nâm sâhibetü’l-hayrın mahmiye-i mezbûrede el-Hâc Bayram Kaftânî Câmi‘-i şerîfinde mevzû‘ Dersiye Vakfı müsakkafâtından yine mârrü’z-zikr İskender Ağa mahallesinde kâin ma‘lûmü’l-hudûd bir bâb vakıf menzilini mukaddemâ hayatında gāib ani’l-meclis İbrahim b. el-Hâc Osman’a cihet-i karzdan seksen guruş deyni mukābelesinde mütevellîsi işbu hâzır bi’l-meclis İbrahim Ağa b. Lütfullah ma‘rifetiyle vefâen ferâğ ve gāib-i mezbûr İbrahim dahi menzil-i mezkûru kable’l-fek müvekkil-i mûmâ-ileyhe ferâğ ve kasr-ı yed edip lâkin menzil-i mezkûr bana intikāl-i âdî ile intikāl etmekle menzil-i mezkûru müvekkil-i [mûmâ] ileyhden bu esnâda taleb ve da‘vâya tesaddî etmiş idim. El-hâletü hâzihî beynimizde muslihûn tavassutuyla ber-vech-i muharrer tesaddî eylediğim da‘vâ-yı mezkûremden beni müvekkil-i mûmâ-ileyh Ömer Efendi ile kırk guruş üzerine inşâ-i akd-i sulh eylediklerinde ben dahi sulh-ı mezkûru kabûl ve bedel-i sulh olan meblağ-ı mezbûr kırk guruşu müvekkil-i mûmâ-ileyh Ömer Efendi yedinden tamamen ahz ü kabz edip menzil-i mezkûra ve bedeline müte‘allika âmme-i de‘âvî ve kâffe-i mutâlebâtdan müvekkil-i mûmâ-ileyh Ömer Efendi’nin zimmetini ibrâ-yı âmm-ı kātı‘u’n-nizâ‘la ibrâ ve ıskāt eylediğimde ol dahi ibrâmı kabûl eyledi dedikde gıbbe’t-tasdîki’ş-şer‘î. Fî 7 Ca sene 1197 Şühûdü’l-hâl: el-Hâc Musa b. Süleyman, Osman Ağa b. İbrahim, Hüseyin Ağa b. Ali, Molla Ali b. Halil, Yusuf Ağa b. Abdullah.