Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 379 Hüküm no: 412 Orijinal metin no: [59b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Uzun Yusuf mahallesinden Emine Hanım’ın yanmış olan ev enkazı ile arsanın kendisine ait hissesini İsmail Ağa’ya sattığı, mukataalı arsayı da ferağ ettiği Sırf mülk arsa ve mukāta‘alı arsada enkāz mübâya‘ası ve mukāta‘alı arsayı ferâğ Mahmiye-i İslâmbol’da Uzun Yusuf mahallesinde sâkine Emine Hanım bt. Ahmed Bey tarafından husûs-ı âti’l-beyânı ikrâra vekîl olduğu zâtını ârifân Hafız Numan Efendi b. Süleyman ve Hasan Ağa b. Mehmed şehâdetleriyle şer‘an sâbit ve zâtı şâhidân-ı mezbûrân ta‘rîfleriyle mu‘arrefe olan Ümmühani bt. Mustafa nâm hatun meclis-i şer‘-i hatîr-i lâzımü’t-tevkīrde işbu bâ‘isü’l-kitâb İsmail Ağa b. Mehmed nâm kimesne mahzarında bi’l-vekâle ikrâr ve takrîr-i kelâm edip mahmiye-i mezbûrede Avratpazarı kurbünde Hobyar mahallesinde vâki‘ iki tarafdan müvekkilem mezbûrenin âhar arsası ve bir tarafdan bakkāl Ebûbekir zimmî arsası ve bir tarafdan tarîk-i âm ile mahdûd derûnunda bir bi’r-i mâ ve sâir enkāz-ı mevcûdeyi hâvî hâriciye ta‘bîr olunur bir bâb muhterik menzil arsasının yüz doksan dört buçuk zirâ‘ mahâlli merhûm Hüsrev Ağa Vakfı’na senevî iki yüz kırk akçe mukāta‘a-i kadîmeli ve mâ‘adâ arsası müvekkilem mezbûre Emine Hanım’ın akd-i âti’z-zikrin sudûruna değin bâ-hüccet-i şer‘iye irsen ve şirâen yedinde mülk ve hakkım olmağın müvekkilem mezbûre Emine Hanım arsa-i mahdûde-i mezkûrenin mülk olan mahâlli ile zikr olunan mukāta‘alı arsa derûnunda olan enkāz-ı mevcûde-i ma‘lûmesini tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ile mezbûr İsmail Ağa’ya dört yüz guruşa bey‘ ve temlik ve teslîm ve mukāta‘alı arsasını dahi bâ-ma‘rifet-i mütevellî meccânen ferâğ ve tefvîz eylediğinde ol dahi ber-vech-i muharrer iştirâ ve temellük ve tesellüm ve tefevvüz ve kabûl eyledikden sonra semeni olan meblağ-ı mezbûr dört yüz guruşu müvekkilem mezbûre Emine Hanım mezbûr İsmail Ağa yedinden tamamen ahz ü kabz eyledi, ba‘de’l-yevm arsa-i mahdûde-i mezkûrenin mülk olan mahâlli ile enkāz-ı mevcûde-i ma‘lûmesi mezbûr İsmail Ağa’nın mülk-i müşterâsı ve hakk-ı sarfı ve zikr olunan mukāta‘alı arsa dahi dâhil-i havza-i tasarrufu olup müvekkilem mezbûre Emine Hanım’ın kat‘a alâka ve medhali kalmamışdır dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’s-sâbi‘ min-Cumâdelûlâ sene 1197. Şühûdü’l-hâl: Hafız Numan Efendi b. Süleyman, Mehmed Salih Efendi b. İbrahim, Hasan Ağa b. Mehmed, Molla Ali b. Halil, Mustafa b. Mustafa.