Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 381 Hüküm no: 415 Orijinal metin no: [60a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sancakdar Hayreddin mahallesindeki hisseli yanmış ev arsasının Drohi bt. Sürab’a satılması Arsadan hisse mübâya‘ası Mahmiye-i İslâmbol’da Sancakdâr Hayreddin mahallesinde vâki‘ bir tarafdan Andriyas zimmî arsası ve bir tarafdan Ohannes zimmî arsası ve bir tarafdan Mıgırdıç zimmî arsası ve bir tarîk-i âm ile mahdûd derûnunda bir bi’r-i mâ ve bir mahzen ve sâir enkāz-ı mevcûdeyi müştemil terbî‘an dört yüz zirâ‘ bir bâb muhterik mülk menzil arsasının kırk sekiz sehm i‘tibârıyla on dört sehmi Mikâil nâm zimmî ve yedi sehmi Meyrem nâm Nasrâniye veledi Manatsaga’nın irsen ve yirmi yedi sehmi merkūmân Meganlar ve Meyrem’in anaları Lori bt. Mardıros nâm Nasrâniyenin irsen ve şirâen yedlerinde mülk ve hakları olduğu lede’ş-şer‘i’l-enver zâhir oldukdan sonra merkūm Meganlar zimmî asâleten ve mersûme Lori Nasrâniye kendi nefsinden asîl ve kızı mersûme Meyrem Nasrâniye tarafından husûs-ı âti’l-beyânı ikrâra vekîl olduğu şahsı mersûmeyi âlimân Terzi Agop v. Abraham ve Serobe v. Agop nâm zimmîler şehâdetleriyle şer‘an sâbit ve şahsı şâhidân-ı merkūmân ta‘rîfleriyle mu‘arrefe olan mersûme Lori Nasrâniye meclis-i şer‘-i hatîr-i lâzımü’t-tevkīrde kezâlik şahsı mu‘arrefe olan işbu hâmiletü’r-rakīm Drohi bt. Sürab nâm Nasrâniye muvâcehesinde her biri bi’l-asâle ve bi’l-vekâle ikrâr ve takrîr-i kelâm edip bâlâda tahdîd ve tavsîf olunan arsa-i mahdûde-i mezkûrenin üç yüz on zirâ‘ mahâllini yedimizde ibkā ve bâkī doksan zirâ‘ mahâlli ile zikr olunan üç yüz on zirâ‘ arsa beyninde vâki‘ bi’r-i mâ-i mezkûr ve taş duvar müşterek olmak üzere doksan zirâ‘ arsa-i mezkûremizi tarafeynden îcâb ve kabûlü hâvî bey‘-i bâtt-ı sahîh-i şer‘î ile mersûme Drohi Nasrâniye bi’l-asâle ve bi’l-vekâle üç yüz yetmiş bir guruş on paraya bey‘ ve temlik ve teslîm eylediğimizde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr üç yüz yetmiş bir guruş on parayı mersûme Drohi Nasrâniye yedinden bi’l-asâle ve bi’l-vekâle bi-kadri’l-hısas tamamen ahz ü kabz eyledik, ba‘de’l-yevm arsa-i mahdûde-i mezkûrenin doksan zirâ‘ mahâlli ile zikr olunan bi’r-i mâ ve taş duvarın nısf-ı şâyi‘lerinde bizim kat‘a alâka ve medhalimiz kalmayıp mersûme Drohi Nasrâniyenin mülk-i müşterâsı ve hakk-ı sarfı olmuşdur dedikde gıbbe’t-tasdîki’ş-şer‘î mâ-vaka‘a. Fî 9 Ca sene 1197 Şühûdü’l-hâl: Molla Ali b. Halil, Salih b. Halil, Mustafa b. Mustafa, Derzi Agop v. Abraham, Serope v. Agop, Berber Manas v. Aleksan ve gayruhum.