Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 381 Hüküm no: 414 Orijinal metin no: [60a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sofular mahallesindeki yanmış olan ev arsasının Ali Odabaşı ile hanımı Emine’ye ait olduğuna dair şahitler olduğu İstihbâr-ı arsa Mahmiye-i İslâmbol’da Sofular mahallesinde sâkin işbu bâ‘isü’l-kitâb kendi nefsinden asîl ve zevcesi Emine bt. Abdullah nâm hatun tarafından husûs-ı âti’l-beyânda vekîl olduğu zâtını ârifân es-Seyyid İbrahim Ağa b. es-Seyyid Hüseyin ve Mehmed b. İsmail nâm kimesneler şehâdetleriyle şer‘an sâbit olan Ali Odabaşı b. Mehmed nâm kimesne meclis-i şer‘-i hatîr-i lâzımü’t-tevkīrde bi’l-asâle ve bi’l-vekâle takrîr-i kelâm ve bast-ı merâm edip mahalle-i mezbûrede vâki‘ bir tarafdan Mehmed Ağa arsası ve bir tarafdan Alâaddin Efendi türbesi ve bir tarafdan hamam ve bir tarafdan tarîk-i âm ile mahdûd zikr olunan Mehmed Ağa tarafından müşterek duvar ve bi’r-i mâ ve türbe tarafından bir mikdâr damlalık ve müştemilât-ı sâireyi hâvî bir bâb mülk menzilin nısf-ı şâyi‘i benim ve nısf-ı şâyi‘-i âharı dahi zevcem müvekkilem mezbûre Emine Hatun’un Gürcü Hasan Ağa’dan beş yüz guruş semen-i medfû‘a yirmi seneden beri müşterâ yedimizde mülk ve hakkımız iken menzil-i mahdûd-ı mezkûr ile yedimizde olan mülknâme hüccetimiz bundan akdem vukū‘ bulan harîk-i kebîrde bi’l-külliye muhterik olmağla takrîrim vukūf-ı tam bî-garaz Müslimînden suâl ve istihbâr ve haberleri zabt ve tahrîr ve hüccet olunup yedimize i‘tâ olunmak bi’l-asâle ve bi’l-vekâle matlûbumdur dedikde hakīkat-i hâli mukırr-ı mezbûr Ali Odabaşı’nın bâlâda bast ü beyân ve şerh ü ayân eylediği minvâl üzere olduğunu mahalle-i mezbûre ahâlisinden şâhidân-ı mezbûrân es-Seyyid İbrahim Ağa ve Mehmed ile diğer Mehmed Ağa b. Ahmed nâm kimesnelerden her biri meclis-i şer‘de alâ-tarîki’ş-şehâde haber vermeleriyle vâki‘ü’l-hâl hıfzen li’l-makāl bi’t-taleb ketb olundu. Fî 8 Ca sene 1197 Şühûdü’l-hâl: Es-Seyyid İbrahim Ağa b. es-Seyyid Hüseyin, Mehmed Ağa b. İsmail, diğer Mehmed Ağa b. Ahmed, Molla Ali b. Halil.