Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 383 Hüküm no: 417 Orijinal metin no: [60b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ölmüş olan Keli bt. Karabet’in vârislerinden Karabet’in mirastaki hakkını elinde bulunduran Parasaye’den alıp zimmetini ibra ettiği Husûs ile terekeden ibrâ Tahakkuk-ı özr-i şer‘îye binâen zikri âtî husûsun mahâllinde ketb ü tahrîri iltimâs olunmağın savb-ı şer‘-i enverde mezûnen irsâl olunan mevlana Hafız Numan Efendi b. Süleyman mahmiye-i İslâmbol’da Abdi Çelebi mahallesinde kâin enserci Marat v. Abraham zimmînin mütemekkin olduğu menzile varıp zeyl-i vesîkada muharrerü’l-esâmî kimesneler huzûrlarında akd-i meclis-i şer‘-i âlî eyledikde menzil-i mezkûrda mütemekkine iken bundan akdem hâlike olan Keli bt. Karabet nâm Nasrâniyenin verâseti zevc-i metrûkü Komadas zimmî ile sadrî kebîr oğlu Karabet zimmî ve sadriye kebîre kızı Perasaye Nasrâniye v. el-merkūm Komadas’a münhasıra ve mesele-i mîrâsları dört sehm i‘tibârıyla bir sehmi zevci merkūm Komadas zimmîye ve iki sehmi oğlu merkūm Karabet zimmîye ve bir sehmi kızı mersûme Perasaye Nasrâniyeye isâbeti tahakkukundan sonra mersûme Perasaye Nasrâniye şahsı ba‘de’t-ta‘rîfi’ş-şer‘î meclis-i ma‘kūd-ı mezkûrda karındaşı işbu hâmilü’r-rakīm merkūm Karabet zimmî muvâcehesinde bi’l-verâse ve takrîr-i kelâm edip anam mûrise-i hâlike-i mersûmenin terekesinden i‘tibâr-ı mezkûr üzere benim bir sehmime isâbet eden hisse-i irsiye-i ma‘lûmeme karındaşım merkūm bi’l-emâne vaz‘-ı yed etmiş idi. El-hâletü hâzihî anam hâlike-i mersûmenin terekesinden vâzı‘ü’l-yed olduğu hisse-i irsiye-i ma‘lûmemi bana def‘ ve teslîm eyledikde ben dahi yedinden tamamen ahz ü kabz ve istifâ-yı hak edip anam hâlike-i mersûmenin terekesinden karındaşım merkūm Karabet zimmî zimmetinde bir akçe ve bir habbe bâkī kalmamağla anam hâlike-i mersûmenin cüz’î ve küllî terekesine ve hukūk-ı mîrâsa ve sâire müte‘allika âmme-i de‘âvî ve kâffe-i mutâlebâtdan karındaşım merkūm Karabet zimmînin zimmetini ibrâ ve ıskāt eylediğimde ol dahi ibrâmı kabûl eyledi dedikde gıbbe’t-tasdîki’ş-şer‘î vâki‘ hâli mevlana-yı mezbûr mahâllinde ketb ü tahrîr ba‘dehû mâ‘an meb‘ûs ümenâ-i şer‘le meclis-i şer‘a gelip alâ-vukū‘ıhî inhâ ve takrîr etmeğin mâ-vaka‘a bi’t-taleb. Fî 10 Ca sene 1197 Şühûdü’l-hâl: Molla Ali b. Halil, Ali Ağa b. Mehmed, Karabet v. Panos, Haçador v. Artin, Bağdasar v. Donik, Haçun v. Sahak, Marat v. Abraham ve gayruhum.