Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 384 Hüküm no: 418 Orijinal metin no: [60b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine bt. İsmail’in zevci İsmail Ağa’ya mehrini ve bazı mücevherlerini hibe ettiği, bazı eşyasını da sattığı Eşyâ mübâya‘ası ma‘a hibe ve ibrâ Mahmiye-i İslâmbol’da Topkapısı dâhilinde Kürkçübaşı mahallesinde sâkine Emine bt. İsmail nâm tarafından husûs-ı âti’l-beyânı ikrâra vekîl olduğu zâtını ârifân el-Hâc Yusuf b. Ali ve Mehmed Ali Ağa b. Süleyman nâm kimesneler şehâdetleriyle şer‘an sâbit olan imâm vekîli Mustafa Efendi b. Hüseyin meclis-i şer‘-i hatîr-i lâzımü’t-tevkīrde müvekkile-i mezbûrenin hâlâ zevci işbu bâ‘isü’l-kitâb İsmail Ağa b. Halil mahzarında bi’l-vekâle ikrâr ve takrîr-i kelâm edip müvekkilem mezbûre Emine Hatun zevci mezbûr zimmetinde ma‘kūdun-aleyh olan yirmi yedi guruş mehr-i müecceli ile yedinde mâlı olan zümrüd taşlı bir çift altın küpe ve iki altın yüzüğünü hibe-i sahîha-i şer‘iye ile târih-i kitâbdan yetmiş gün mukaddem zevci mezbûr İsmail Ağa’ya hibe ve temlik ve teslîm eylediğinde ol dahi târih-i mezbûrda ber-vech-i muharrer ittihâb ve temellük ve tesellüm ve kabz ve kabûl eyledikden sonra eşyâ-i memlûkesinden bâ-defter-i müfredât kıtık memlû on çatma yasdık ve beş minder ve üç çuka mak‘ad ve bir beledî döşek ma‘a şilte ve üç minder şiltesi ve dört yemeni yorgan bâ-çârşeb ve üç baş yasdığı ve bir orta keçesi ve dört tencere ma‘a kapak ve on sahan ve üç kapak ve bir mankāl ve bir leğen ma‘a ibrik ve bir sini ve iki tepsi ve iki şorba tası ve bir âbdest leğeni ve bir kebîr tencere köhne şalî ve şal beş entari ve keremsûda kaplı iki kedi kürkü ve bir kadife cübbesini dahi yine târih-i mezbûrda tarafeynden îcâb ve kabûlü hâvî bey‘-i bâtt-ı sahîh-i şer‘î ve safka-i vâhide ile zevci mezbûr İsmail Ağa’ya elli guruşa bey‘ ve temlik ve teslîm eyledikde ol dahi târih-i mezbûrda ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr elli guruşa ve müvekkilem mezbûre Emine Hatun’un zevci mezbûr ile sâir beynlerinde cârî ahz ü i‘tâya müte‘allika âmme-i de‘âvîden müvekkilem mezbûre zevci mezbûrun zimmetin ibrâ ve ıskāt eyledikde ol dahi ibrâsını kabûl etmeğin ol-vechile mehr-i mezkûr yirmi yedi guruşdan mezbûr İsmail Ağa’nın târih-i mezbûrdan beri zimmeti berî ve zikr olunan küpe ve yüzüklerimin mevhûbu ve eşyâ-i muharrere-i mezkûre dahi mülk-i müşterâsı ve hakk-ı sarfı olup müvekkilem mezbûre Emine Hatun’un kat‘a alâka ve medhali kalmamışdır dedikde gıbbe’t-tasdîki’ş-şer‘î mukırr-ı vekîl-i mezbûr Mustafa Efendi yine meclis-i şer‘de müvekkilenin zevci mezbûr İsmail Ağa mahzarında i‘âde-i kelâm edip müvekkilem mezbûre Emine Hatun zevci mezbûr ile mahalle-i mezbûrede vâki‘ mâ‘an sâkin oldukları menzil derûnunda mevcûd bisât-ı beyt ve evân-ı nühâsiye ve gayr-ı nühâsiye ve bi’l-külliye eşyâ zevci mezbûr İsmail Ağa’nın mâlı ve mülkü olup müvekkilem mezbûrenin kat‘a alâka ve medhali yokdur dedikde mâ-vaka‘a bi’t-taleb. Fî 10 Ca sene 1197 Şühûdü’l-hâl: Hacı Hasan b. Mehmed, Hacı Yusuf b. Ali, Mehmed Ali Ağa b. el-Hâc Süleyman, Hasan Ağa b. Osman, Hüseyin Beşe b. Osman, Dellâl Ali Ağa, Ahmed Odabaşı 88 C., Ömer Odabaşı 14 S. , es-Seyyid Mehmed Odabaşı b. ( ) 31 S.