Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 393 Hüküm no: 428 Orijinal metin no: [62b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Başcı Mahmud mahallesinden Safiye bt. Osman ile Ebubekir b. Hasan’ın boşandıkları Muhâla‘a Mahmiye-i İslâmbol’da Başcı el-Hâc Mahmud mahallesinde sâkine ve zâtı vech-i şer‘î üzere mu‘arrefe olan Safiye bt. el-Hâc Osman nâm hatun meclis-i şer‘-i hatîr-i lâzımü’t-tevkīrde zevc-i dâhili işbu bâ‘isü’l-kitâb el-Hâc Ebûbekir b. Hasan nâm kimesne mahzarında ikrâr ve takrîr-i kelâm edip mezbûr el-Hâc Ebûbekir zevcim olup lâkin beynimizde hüsn-i mu‘âşeretimiz olmayıp ben hul‘a tâlibe olduğum ecilden zevcim mezbûrun zimmetinde mütekarrer ve ma‘kūdun-aleyh olan yüz guruş mehr-i müeccelim ve nafaka-i iddet-i ma‘lûmem üzerlerine ve meûnet-i süknâm dahi kendi üzerime olmak üzere zevcim mezbûr el-Hâc Ebûbekir ile muhâla‘a-i sahîha-i şer‘iye ile hul‘ olduğumda ol dahi ber-vech-i muharrer hul‘-ı mezbûru ba‘de’l-kabûl hukūk-ı zevciyete ve zevcim mezbûr mâlımdan âhara rehin ve teslîm eylediği on sekiz miskāl bir çift altın bilezikden mâ‘adâ hukūk-ı sâireye müte‘allika âmme-i de‘âvî ve kâffe-i mutâlebâtdan ben zevcim mezbûr el-Hâc Ebûbekir’in zimmetini ibrâ ve ıskāt eylediğimde ol dahi kezâlik hukūk-ı zevciyete ve sâire müte‘allika âmme-i de‘âvîden benim zimmetimi ibrâ ve ıskāt edip her birimiz ber-minvâl-i muharrer âharın ibrâsını kabûl eyledik dedikde gıbbe’t-tasdîki’ş-şer‘î mâ-vaka‘a. Fî 15 Ca sene 1197 Şühûdü’l-hâl: Molla Ali b. Halil, Molla Mehmed b. Mustafa, Mustafa b. Mustafa.