Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 393 Hüküm no: 429 Orijinal metin no: [62b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bayram Kaftânî mahallesinden Hasan Ağa’nın Safiye bt. Abdullah’a olan borcunu ödediği Elli guruş ahz ü kabz Mahmiye-i İslâmbol’da el-Hâc Bayram Kaftânî mahallesinde sâkine ve zâtı vech-i şer‘î üzere mu‘arrefe olan Safiye bt. Abdullah nâm hatun meclis-i şer‘-i hatîr-i lâzımü’t-tevkīrde işbu bâ‘isü’l-kitâb Hasan Ağa b. Ali Efendi mahzarında ikrâr ve takrîr-i kelâm edip mezbûr Hasan Ağa târih-i kitâbdan iki sene mukaddem yedimden ve mâlımdan istikrâz ve kabz ve umûruna sarfla istihlâk eylediği elli guruş alacak hakkımı bana def‘ ve teslîm eyledikde ben dahi yedinden tamamen ahz ü kabz edip meblağ-ı mezbûr elli guruşdan mezbûr Hasan Ağa yed ve zimmetinde bir akçe ve bir habbe bâkī kalmamağla husûs-ı mezkûra ve sâire müte‘allika âmme-i de‘âvî ve kâffe-i mutâlebâtdan mezbûr Hasan Ağa’nın zimmetini ibrâ-i âm ile ibrâ ve ıskāt eylediğimde ol dahi ibrâmı kabûl eyledi dedikde gıbbe’t-tasdîki’ş-şer‘î. Fî 14 min-Ca sene 1197 Şühûdü’l-hâl: Halil Efendi b. ( ) imâm-ı mahalle-i mezbûre, el-Hâc İbrahim b. Mehmed, Mehmed Said b. İsmail, Molla Ali b. Halil, Hacı Hasan b. Osman.