Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 397 Hüküm no: 434 Orijinal metin no: [63a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bayezid mahallesinden Rukiye Hatun ile Ahmed Ağa’nın boşandıkları Muhâla‘a Mahmiye-i İslâmbol’da Arabacı Bâyezid mahallesinde sâkine ve zâtı vech-i şer‘î üzere mu‘arrefe olan Rukiye Hatun bt. Süleyman meclis-i şer‘-i hatîr-i lâzımü’t-tevkīrde zevc-i dâhili işbu bâ‘isü’l-kitâb Ahmed Ağa b. İbrahim nâm kimesne mahzarında ikrâr ve takrîr-i kelâm edip mezbûr Ahmed Ağa zevcim olup lâkin beynimizde hüsn-i mu‘âşeretimiz olmayıp ben hul‘a tâlibe olduğum ecilden zevcim mezbûrun zimmetinde mütekarrer ve ma‘kūdun-aleyh olan kırk guruş mehr-i müeccelim ve nafaka-i iddet-i ma‘lûmem üzerlerine ve meûnet-i süknâm dahi kendi üzerime olup ve zevcim mezbûra mâlımdan medfû‘um olan dört buçuk guruş dahi bedel-i hul‘ olmak üzere zevcim mezbûr Ahmed Ağa ile muhâla‘a-i sahîha-i şer‘iye ile hul‘ olduğumda ol dahi ber-vech-i muharrer hul‘-ı mezbûru ba‘de’l-kabûl hukūk-ı zevciyete ve ibtidâ-i zevciyetden târih-i kitâba gelince beynimizde cârî bi’l-cümle ahz ü i‘tâya müte‘allika âmme-i de‘âvî ve kâffe-i mutâlebâtdan ben zevcim mezbûr Ahmed Ağa’nın zimmetini ibrâ ve ıskāt eylediğimde ol dahi kezâlik hukūk-ı zevciyete ve sâire müte‘allika âmme-i de‘âvîden benim zimmetimi ibrâ ve ıskāt edip her birimiz ber-minvâl-i muharrer âharın ibrâsını kabûl eyledik dedikde gıbbe’t-tasdîki’ş-şer‘î mâ-vaka‘a. Fî 20 min-Ca sene 1197 Şühûdü’l-hâl: Molla Mustafa b. Mehmed kahveci, Mehmed Emin Ağa b. ( ), Molla Ali b. Halil, Ahmed b. Mehmed.