Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 396 Hüküm no: 433 Orijinal metin no: [63a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Mustafa Çavuş’un vârislerinin ev, arsa, harman yeri ve samanhaneden kendi hakları olan kısımları Hasan b. Hüseyin’e sattıkları Emlâk mübâya‘ası Fi’l-asl vilâyet-i Anadolu’da Zağferanborlu kazâsına tâbi‘ Bulak karyesi ahâlisinden olup mahmiye-i İslâmbol’da Davudpaşa mahallesinde sâkin iken bundan akdem vefât eden Mustafa Çavuş Ağa b. Ali’nin verâseti zevce-i menkûha-i metrûkesi Hadice bt. Ali nâm hatun ile sulbî kebîr oğlu Ali Ağa ve sulbiye kebîre kızları Zeyneb ve Fatıma hatunlar taraflarından husûs-ı âti’l-beyânı ikrâra vekîl olduğu zât-ı mezbûretânı ârifân Ahmed b. Abdullah ve Hüseyin b. Ebî Bekir nâm kimesneler şehâdetleriyle şer‘an sâbit olan mu‘arrefetü’z-zât mezbûre Hadice Hatun vekâleten meclis-i şer‘-i hatîr-i lâzımü’t-tevkīrde yine karye-i mezbûre ahâlisinden işbu bâ‘isü’l-kitâb Hasan b. Hüseyin nâm kimesne mahzarında her biri bi’l-asâle ve bi’l-vekâle ikrâr ve takrîr-i kelâm edip karye-i mezbûrede vâki‘ etrâf Emir Ahmed oğlu menzili ve dere ve tarîk-i âm ile mahdûd fevkānî üç bâb oda ve tahtında bir anbar ve ahur ve bağçeyi müştemil bir bâb mülk menzil ile menzil-i mezkûr kurbünde kâin Arıgaltı nâm mahâlde vâki‘ ma‘lûmü’l-hudûd bir dönüm mikdârı kürûmu mülk bir kıt‘a bağ ve yine menzil-i mezkûr mukābilinde kâin kezâlik ma‘lûmü’l-hudûd bir kıt‘a harman yeri ve samanhânenin sekiz sehm i‘tibârıyla birer sehmden cem‘an dört sehmi müşterî-i mezbûr ile zevcesi diğer Hadice ve diğer Hadice’nin li-ebeveyn karındaşları Üveys ve Hasan’ın mülkleri ve dört sehmi dahi mûrisimiz müteveffâ-yı mezbûr Mustafa Çavuş Ağa’nın hayatında ile’l-vefât yedinde mülk ve hakkı olup ba‘de vefâtihî emlâk-i mezkûrenin dört sehmi bize mevrûs olmağın biz emlâk-i mezkûrede ber-vech-i muharrer mâlikler olduğumuz dört sehm hisse-i şâyi‘alarımızı tarafeynden îcâb ve kabûlü hâvî bey‘-i bâtt-ı sahîh-i şer‘î ile mezbûr Hasan’a yetmiş guruşa bi’l-asâle ve bi’l-vekâle bey‘ ve temlik ve her birini mahâllinde kabza taslît eylediğimizde ol dahi ber-vech-i muharrer iştirâ ve temellük ve kabûl eyledikden sonra semeni olan meblağ-ı mezbûr yetmiş guruşu mezbûr Hasan yedinden bi’l-asâle ve bi’l-vekâle bi-kadri’l-hısas tamamen ahz ü kabz eyledik, ba‘de’l-yevm emlâk-i mezkûrenin dört sehm-i şâyi‘inde bizim kat‘a alâka ve medhalimiz kalmayıp mezbûr Hasan’ın mülk-i müşterâsı ve hakk-ı sarfı olmuşdur, mahâllinde mutasarrıf olsun dediklerinde gıbbe’t-tasdîki’ş-şer‘î mâ-vaka‘a. Fî 19 Ca sene 1197 Şühûdü’l-hâl: Ömer b. Süleyman, Hasan b. Mehmed, Ahmed b. Abdullah, Hüseyin b. Ebîbekir, Molla Ali b. Halil.