Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 398 Hüküm no: 436 Orijinal metin no: [63b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Aydın Kethuda mahallesinden Fatma bt. Abdullah’ın küçük kızı Havva’ya nafaka takdiri Nafaka-i sagīre Mahmiye-i İslâmbol’da Aydın Kethudâ mahallesinde sâkine ve zâtı vech-i şer‘î üzere mu‘arrefe olan işbu bâ‘isetü’l-vesîka Fatıma bt. Abdullah nâm hatun meclis-i şer‘-i hatîr-i lâzımü’t-tevkīrde zevc-i muhâlı‘ı Mehmed Ağa b. Mustafa nâm kimesne mahzarında takrîr-i kelâm ve bast-ı merâm edip zevc-i muhâlı‘ım mezbûr Mehmed Ağa’nın firâşından hâsıla ve benden mütevellide bi-hakkı’l-hıdâne hâlâ hacr u terbiyemde olan işbu sadriye kızım Havva nâm sagīrenin mâlı olmayıp nafaka ve kisveye ihtiyâcı olmağla kızım sagīre-i mezbûrenin nafaka ve kisve-bahâsı içün babası mezbûr Mehmed Ağa üzerine kıbel-i şer‘den kadr-ı ma‘rûf meblağ farz ve takdîr olunmak bi’l-hıdâne matlûbumdur dedikde gıbbe’t-tasdîki’ş-şer‘î hâkim-i muvakkı‘-ı sadr-ı kitâb -tûbâ-lehû ve hüsnü-meâb- efendi hazretleri dahi sagīre-i mezbûrenin ber-vech-i muharrer nafaka ve kisve-bahâsı içün babası mezbûr Mehmed Ağa üzerine bi’t-terâzî târih-i kitâbdan küllü yevm dörder para farz ve takdîr edip meblağ-ı mefrûz-ı mezkûru sagīre-i mezbûrenin nafaka ve kisvesine harc u sarfa ve lede’l-iktizâ istidâneye ve inde’z-zafer babası mezbûr Mehmed Ağa üzerine rücû‘a mezbûre Fatıma Hatun’a izin vermeğin mâ-vaka‘a bi’t-taleb ketb olundu. Fî 20 Ca sene 1197 Şühûdü’l-hâl: Es-Seyyid Mustafa kahveci, Sîmkeş Ali Ağa b. ( ), Molla Ali b. Halil, Ahmed b. Mehmed.