Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 399 Hüküm no: 437 Orijinal metin no: [63b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Defterdar Ahmed Çelebi mahallesinden Ayşe bt. Mustafa ile Mehmed Emin’in boşanması Muhâla‘a Mahmiye-i İslâmbol’da Defterdâr Ahmed Çelebi mahallesinde sâkine ve zâtı vech-i şer‘î üzere mu‘arrefe olan Âişe bt. Mustafa nâm hatun meclis-i şer‘-i hatîr-i lâzımü’t-tevkīrde zevc-i dâhili işbu bâ‘isü’l-kitâb es-Seyyid Mehmed Emin b. es-Seyyid el-Hâc Halil mahzarında ikrâr ve takrîr-i kelâm edip mezbûr es-Seyyid Mehmed Emin zevcim olup lâkin beynimizde hüsn-i mu‘âşeretimiz olmayıp ben hul‘a tâlibe olduğum ecilden zevcim mezbûrun zimmetinde mütekarrer ve ma‘kūdun-aleyh olan otuz beş guruş mehr-i müeccelim ve nafaka-i iddet-i ma‘lûmem üzerlerine ve meûnet-i süknâm dahi kendi üzerime olmak üzere zevcim mezbûr es-Seyyid Mehmed Emin ile muhâla‘a-i sahîha-i şer‘iye ile hul‘ olduğumda ol dahi ber-vech-i muharrer hul‘-ı mezbûru ba‘de’l-kabûl hukūk-ı zevciyete ve sâire müte‘allika âmme-i de‘âvî ve kâffe-i mutâlebâtdan her birimiz âharın zimmetini ibrâ ve ıskāt edip her birimiz ber-minvâl-i muharrer âharın ibrâsını kabûl eyledik dedikde gıbbe’t-tasdîki’ş-şer‘î mâ-vaka‘a bi’t-taleb. Fî 22 Ca sene 1197 Şühûdü’l-hâl: Ahmed b. Ömer, Molla Ali b. Halil, Hacı Hasan b. Osman, Molla Mehmed b. Mustafa, es-Seyyid Mustafa Kahveci.