Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 407 Hüküm no: 449 Orijinal metin no: [65a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahimpaşa mahallesinden Emetullah bt. Hüseyin ile Ömer Usta b. Musa’nın boşanması Muhâla‘a Mahmiye-i İslâmbol’da İbrahim Paşa mahallesinde sâkine ve zâtı vech-i şer‘î üzere mu‘arrefe olan Emetullah bt. Hüseyin nâm hatun meclis-i şer‘-i şerîf-i enverde zevc-i dâhili işbu bâ‘isü’l-kitâb Ömer Usta b. Musa nâm kimesne mahzarında ikrâr ve takrîr-i kelâm edip mezbûr Ömer Usta zevcim olup lâkin beynimizde hüsn-i mu‘âşeretimiz olmayıp ben hul‘a tâlibe olduğum ecilden zevcim mezbûrun iki def‘a akdim müsemmâ zimmetinde mütekarrer ve ma‘kūdun-aleyh olan yedi bin akçe mehr-i müeccelim ve nafaka-i iddet-i ma‘lûmem üzerlerine ve meûnet-i süknâm dahi kendi üzerime olmak üzere zevcim mezbûr Ömer Usta ile muhâla‘a-i sahîha-i şer‘iye ile hul‘ olduğumda ol dahi ber-vech-i muharrer hul‘-ı mezbûru ba‘de’l-kabûl hukūk-ı zevciyete ve matlûbum olan hakk-ı ta‘zîre müte‘allika âmme-i de‘âvî ve kâffe-i mutâlebâtdan ben zevcim mezbûr Ömer Usta’nın zimmetini ibrâ ve ıskāt eylediğimde ol dahi kezâlik hukūk-ı zevciyete müte‘allika âmme-i de‘âvîden benim zimmetimi ibrâ ve ıskāt edip her birimiz ber-minvâl-i muharrer âharın ibrâsını kabûl eyledik dedikde gıbbe’t-tasdîki’ş-şer‘î mâ-vaka‘a. Fî 27 Ca sene 1197 Şühûdü’l-hâl: Es-Seyyid Mehmed Efendi b. es-Seyyid el-Hâc Hasan imâm vekîli, Mustafa Beşe b. Mehmed, Müezzin Abdi Efendi, Koltukçu Uzun Ali, Molla Ali b. Halil.