Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 407 Hüküm no: 448 Orijinal metin no: [65a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kâtib Muslihiddin mahallesinden Zeyneb bt. Abdullah ile Osman b. Abdullah’ın boşandıkları Muhâla‘a Mahmiye-i İslâmbol’da Aksaray kurbünde Kâtib Muslihiddin mahallesinde sâkine ve zâtı vech-i şer‘î üzere mu‘arrefe olan Zeyneb bt. Abdullah nâm zenciye meclis-i şer‘-i şerîf-i enverde zevc-i dâhili işbu bâ‘isü’l-kitâb Osman b. Abdullah nâm kimesne mahzarında ikrâr ve takrîr-i kelâm edip mezbûr Osman zevcim olup lâkin beynimizde hüsn-i mu‘âşeretimiz olmayıp ben hul‘a tâlibe olduğum ecilden zevcim mezbûrun zimmetinde mütekarrer ve ma‘kūdun-aleyh olan on yedi guruş mehr-i müeccelim ve nafaka-i iddet-i ma‘lûmem üzerlerine ve meûnet-i süknâm dahi kendi üzerime olmak üzere zevcim mezbûr Osman ile muhâla‘a-i sahîha-i şer‘iye ile hul‘ olduğumda ol dahi ber-vech-i muharrer hul‘-ı mezbûru ba‘de’l-kabûl hukūk-ı zevciyete ve sâire müte‘allika âmme-i de‘âvî ve kâffe-i mutâlebâtdan her birimiz âharın zimmetini ibrâ ve ıskāt edip her birimiz ber-minvâl-i muharrer âharın ibrâsını kabûl eyledik dedikde gıbbe’t-tasdîki’ş-şer‘î mâ-vaka‘a. Fî 27 Ca sene 1197 Şühûdü’l-hâl: Molla b. Halil, Salih b. Halil, Molla Mehmed b. Mustafa, Mustafa b. Mustafa.