Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 409 Hüküm no: 451 Orijinal metin no: [65b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin mahallesinden Hadice Hatun bt. Mehmed ile Mustafa Hasan Efendi’nin birbirlerinin zimmetini ibra ederek boşandıkları Husûs ile tatlîk ve ibrâ Husûs-ı âti’l-beyânın mahâllinde ketb ü tahrîri iltimâs olunmağın savb-ı şer‘-i enverden irsâl olunan kuzâtdan mevlana es-Seyyid Mustafa Sadullah Efendi b. es-Seyyid el-Hâc Mehmed Said mahmiye-i İslâmbol’da Samatya kapısı dâhilinde el-Hâc Hüseyin mahallesinde kâin Müezzin Mehmed Efendi b. Mehmed’in menziline varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i âlî eyledikde menzil-i mezkûrda sâkine ve zâtı Müslimûn-ı merkūmûn ta‘rîfleriyle mu‘arrefe olan Şerife Hadice Hatun bt. es-Seyyid Mehmed meclis-i ma‘kūd-ı mezkûrda zevc-i mutallıkı kuzât-ı kirâm-ı zevi’l-ihtirâmdan bâ‘isü hâze’l-kitâbi’l-müstetâb Mustafa Hasan Efendi b. Hüseyin mahzarında ikrâr-ı tam ve takrîr-i kelâm edip mûmâ-ileyh Mustafa Hasan Efendi yüz guruş mehr-i müeccel tesmiyesiyle zevc-i dâhilim olduğu hâlde târih-i kitâb günü bâyinen tatlîk etmekle zimmetinde ma‘kūdun-aleyh olan mehr-i mezkûr yüz guruş ile zevcim mûmâ-ileyhin firâşından hâsıl hamlim olmağla vaz‘-ı haml ile iddetim münkaziye oluncaya değin nafaka-i hamlim içün bi’t-terâzî yirmi guruş ki cem‘an yüz yirmi guruş zevc-i mutallıkım mûmâ-ileyh Mustafa Hasan Efendi işbu meclis-i ma‘kūd-ı mezkûrda bana def‘ ve teslîm eyledikde ben dahi yedinden tamamen ahz ü kabz edip hukūk-ı zevciyete ve hîn-i akidde mu‘accel tesmiye olunan on müsta‘mel kadife yasdık ve üç çuka mak‘ad ve bir müsta‘mel orta keçesi ve iki tencere ma‘a kapak ve dört sahan ma‘a kapak ve bir tepsi ve iki müsta‘mel yorgan ma‘a çârşebe ve ibtidâ-i zevciyetden târih-i kitâba gelince beynimizde cârî bi’l-cümle hukūk-ı sâireye müte‘allika âmme-i de‘âvî ve kâffe-i mutâlebâtdan ve eymân ve muhâsamâtdan ben zevc-i mutallıkım mûmâ-ileyh Mustafa Hasan Efendi’nin zimmetini ibrâ-i âmm-ı kātı‘u’n-nizâ‘la ibrâ ve ıskāt eylediğimde ol dahi kezâlik hukūk-ı zevciyete ve benden matlûbu olan mecmû‘u iki yüz yirmi dört guruş kıymetli bir sîm sâ‘at ve bir çift altın bilezik ve bir çift altın kuşağa ve sâire müte‘allika âmme-i de‘âvîden benim zimmetimi ibrâ ve ıskāt edip her birimiz ber-minvâl-i muharrer âharın ibrâsını kabûl eyledik dedikde mûmâ-ileyh Mustafa Hasan Efendi dahi zevce-i mutallakası mukırre-i mezbûre Şerife Hadice Hatun’u cemî‘ kelimât-ı meşrûhasında vicâhen ve şifâhen tahkīk ve tasdîk eylediğini mevlana-yı mezbûr mahâllinde ketb ü tahrîr ve mâ‘an ba‘s olunan ümenâ-i şer‘le meclis-i şer‘a gelip alâ-vukū‘ıhî inhâ ve takrîr etmeğin mâ-vaka‘a bi’t-taleb. Fî 28 min-Ca sene 1197 Şühûdü’l-hâl: Hafız Ahmed Efendi b. Mehmed, Mehmed Efendi b. Ahmed, Müezzin Mehmed Efendi b. Mehmed, İbrahim Efendi b. Sadullah, Mustafa b. Mustafa, Molla Mehmed b. Mustafa ve gayruhum.