Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 425 Hüküm no: 471 Orijinal metin no: [68b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Es-Seyyid Ömer mahallesinden Hacce Emine Hatun’un vasiyetini yerine getirmek üzere Zeliha bt. Abdullah’ı vasi tayini Mukaddemâ olan vasiyetden rücû‘ tekrar vasiyet Mahmiye-i İslâmbol’da es-Seyyid Ömer mahallesinde sâkine ve zâtı ta‘rîf-i şer‘î ile mu‘arrefe olan Hacce Emine Hatun bt. Abdullah meclis-i şer‘-i hatîr-i lâzımü’t-tevkīrde mukaddemâ sülüs-i vesâyeti tenfîze bâ-hüccet-i şer‘iye vasîyy-i muhtâr nasb ü ta‘yîn eylediği kezâlik zâtı mu‘arrefe işbu bâ‘isetü’l-vesîka Zeliha bt. Abdullah nâm hatun mahzarında ikrâr ve takrîr-i kelâm edip ben bundan akdem sülüs-i vesâyâmı tenfîze mezbûre Zeliha Hatun’u vasîyy-i muhtâr nasb ü ta‘yîn eylediğimden sonra vukū‘ bulan harîk-i kebîrde mecmû‘-ı terekem muhterik olmağla ben vasiyet-i mezkûremden rücû‘ edip benim yedimde mâlım ve mülküm ancak bir döşek ve iki yasdık ve iki yorgan ma‘a çârşeb ve iki sahan ve bir tencere ve bir tâbe ve bir çuka ferâce ve bir köhne Şam alacası entari ve lâbise olduğum köhne libâsıma münhasıra olmağla ben bi-emrillâhi te‘âlâ vefât eylediğimde mezbûre Zeliha Hatun benim yine vasîyy-i muhtârem eşyâ-i muharrere-i mezkûremi bi’l-vesâye ahz ü kabz edip hâsıl olan esmânından techîz ve tekfîn ve sâir levâzım-ı defnim umûruna kadr-ı ma‘rûf meblağ harc ü sarf eyleye deyü vasiyet ve tenfîzine mezbûre Zeliha Hatun vasîyy-i muhtâr nasb ü ta‘yîn eyledikde ol dahi vesâyet-i mezkûreyi kabûl ve hizmet-i lâzımesin kemâ-yenbagī edâya ta‘ahhüd ve iltizâm etmeğin mâ-vaka‘a bi’t-taleb. Fî-selhi Ca sene 1197 Şühûdü’l-hâl: Mehmed Tâhir Efendi b. Mehmed, el-Hâc Mustafa Efendi b. Mehmed, Mehmed Sıdkı Efendi b. Mehmed, İmâm Hüseyin Efendi b. İbrahim, Süleyman Odabaşı b. Ahmed, Camcı Ahmed b. Abdullah, Molla Ali b. Halil ve gayruhum.