Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 424 Hüküm no: 470 Orijinal metin no: [68b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali b. İbrahim’in Kasap İlyas mahallesinde vefat eden Mustafa b. Mehmed’de olan alacağından vazgeçtiği Müteveffâ zimmetinde olan elli guruş da‘vâsından vereseyi ibrâ Mahmiye-i İslâmbol’da Kasab İlyas mahallesinde sâkin iken bundan akdem vefât eden Mustafa b. Mehmed’in verâseti zevce-i menkûha-i metrûkesi Fatıma bt. Mustafa nâm hatun ile sulbî sagīr oğlu Mehmed’e münhasıra olduğu lede’ş-şer‘i’l-enver zâhir oldukdan sonra mahalle-i mezbûrede sâkin Ali b. İbrahim nâm kimesne şer‘-i şerîf-i enverde işbu bâ‘isü’l-kitâb kendi nefsinden asîl ve sagīr-i mezbûr Mehmed’in tesviye-i emrini rü’yete mansûbe vasîsi olup zâtı ta‘rîf-i şer‘î ile mu‘arrefe olan mezbûre Fatıma Hatun mahzarında ikrâr ve takrîr-i kelâm edip benim müteveffâ-yı mezbûr Mustafa zimmetinde cihet-i karzdan elli guruş alacak hakkım olmağla meblağ-ı mezbûr elli guruşu bana kable’l-edâ mezbûr Mustafa fevt olmağla ben meblağ-ı mezbûr elli guruşu müteveffâ-yı mezbûr Mustafa’nın terekesinden olmak üzere mezbûre Fatıma Hatun’dan bu esnâda taleb ve da‘vâya tesaddî etmiş idim. El-hâletü hâzihî beynimizde muslihûn tavassutuyla ber-vech-i muharrer tesaddî eylediğim da‘vâ-yı mezkûremden meccânen fâriğ olup meblağ-ı mezbûr elli guruşa müte‘allika âmme-i de‘âvî ve kâffe-i mutâlebâtdan mezbûre Fatıma Hatun ile oğlu sagīr-i mezbûr Mehmed’den her birinin zimmetlerini ibrâ-i âmm-ı kātı‘u’n-nizâ‘la ibrâ ve ıskāt eylediğimde mezbûre Fatıma Hatun dahi asâleten ve vesâyeten ibrâmı kabûl eyledi dedikde gıbbe’t-tasdîki’ş-şer‘î mâ-vaka‘a. Fî 29 min-Ca sene 1197 Şühûdü’l-hâl: Seyyid Yakub b. İbrahim, Hacı Hasan b. Mehmed, Molla Ali b. Halil, Samancı Mahmud b. ( ).