Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 426 Hüküm no: 473 Orijinal metin no: [69a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emin-i Cev mahallesinden Ayşe bt. Mustafa ile es-Seyyid Halil Beşe b. es-Seyyid Osman’ın boşandıkları Muhâla‘a Mahmiye-i İslâmbol’da Yenibahçe kurbünde Emîn-i Cev mahallesinde sâkine ve zâtı vech-i şer‘î üzere mu‘arrefe olan Âişe bt. Mustafa nâm hatun meclis-i şer‘-i şerîf-i enverde zevc-i dâhili işbu bâ‘isü’l-kitâb es-Seyyid Halil Beşe b. es-Seyyid Osman nâm kimesne mahzarında ikrâr ve takrîr-i kelâm edip mezbûr es-Seyyid Halil Beşe zevcim olup lâkin beynimizde hüsn-i mu‘âşeretimiz olmayıp ben hul‘a tâlibe olduğum ecilden zevcim mezbûrun zimmetinde mütekarrer ve ma‘kūdun-aleyh olan on guruş mehr-i müeccelim ve nafaka-i iddet-i ma‘lûmem üzerlerine ve meûnet-i süknâm dahi kendi üzerime olmak üzere zevcim mezbûr es-Seyyid Halil Beşe ile muhâla‘a sahîha-i şer‘iye ile hul‘ olduğumda ol dahi ber-vech-i muharrer hul‘-ı mezbûru ba‘de’l-kabûl hukūk-ı zevciyete müte‘allika âmme-i de‘âvî ve kâffe-i mutâlebâtdan her birimiz âharın zimmetini ibrâ ve ıskāt edip her birimiz ber-minvâl-i muharrer âharın ibrâsını kabûl eyledik dedikde gıbbe’t-tasdîki’ş-şer‘î mâ-vaka‘a. Fî 2 C sene 1197 Şühûdü’l-hâl: Es-Seyyid Ali b. es-Seyyid Osman, Berber es-Seyyid Mustafa, Molla Ali b. Halil, Salih b. Halil, Ömer b. ( ).