Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 427 Hüküm no: 474 Orijinal metin no: [69a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. Hüseyin’in vefat eden Abdullah b. Ali’ye olan borcu konusunda vârislerden Musa ile sulh bedeli karşılığı anlaştığı Hissesini da‘vâ ve ibrâ Mahmiye-i İslâmbol’da Kiçi Hatun mahallesinde sâkin iken bundan akdem vefât eden es-Seyyid Abdullah b. Ali’nin verâseti zevce-i menkûha-i metrûkesi Hadice bt. Abdullah nâm hatun ile li-ebeveyn kız karındaşı Şerife Fatıma nâm hatuna ve babasının ammisi oğlunun oğlu es-Seyyid Musa b. Ali nâm kimesneye münhasıra ve mesele-i mîrâsları dört sehm i‘tibârıyla bir sehmi zevcesi mezbûre Hadice Hatun’a ve iki sehmi kız karındaşı mezbûre Şerife Fatıma Hatun’a ve bir sehmi mezbûr es-Seyyid Musa’ya isâbeti tahakkukundan sonra mezbûr es-Seyyid Musa meclis-i şer‘-i şerîf-i enverde işbu bâ‘isü’l-kitâb Mehmed b. Hüseyin nâm kimesne mahzarında ikrâr ve takrîr-i kelâm edip mûrisim müteveffâ-yı mezbûr es-Seyyid Abdullah’ın mezbûr Mehmed zimmetinde cihet-i karzdan iki yüz guruş alacak hakkı olup meblağ-ı mezbûru kable’l-ahz ve’l-istifâ mezbûr es-Seyyid Abdullah fevt ve meblağ-ı mezbûr benimle zevcesi mezbûre Hadice’ye ve kız karındaşı mezbûre Şerife Fatıma Hatun’a mevrûs olmağın ben meblağ-ı mezbûr iki yüz guruşdan i‘tibâr-ı mezkûr üzere benim bir sehm hisse-i irsiyeme isâbet eden elli guruşu mezbûr Mehmed’den bu esnâda taleb ve da‘vâya tesaddî etmiş idim. El-hâletü hâzihî beynimize muslihûn tavassut edip beni da‘vâ-yı mezkûremden mezbûr Mehmed ile kırk guruş üzerine inşâ-i akd-i sulh eylediklerinde ben dahi sulh-ı mezkûru kabûl ve bedel-i sulh olan meblağ-ı mezbûr kırk guruşu mezbûr Mehmed yedinden tamamen ahz ü kabz edip mâ‘adâ on guruşa müte‘allika âmme-i de‘âvî ve kâffe-i mutâlebâtdan mezbûr Mehmed’in zimmetini ibrâ ve ıskāt eylediğimde ol dahi ibrâmı kabûl eyledikde gıbbe’t-tasdîki’ş-şer‘î mâ-vaka‘a. Fî-selhi Ca sene 1197 Şühûdü’l-hâl: İsmail Beşe b. Süleyman, Hasan b. Mahmud, Mustafa b. Mehmed, Doğramacı Osman, Molla Ali b. Halil.