Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 432 Hüküm no: 481 Orijinal metin no: [70a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çengelköy’den Osman Beşe’nin bağını bey‘ bi’l-vefâ yoluyla Atiyetullah Hanım’a sattığı Bey‘ bi’l-vefâ tarîkiyle bağ mübâya‘ası Medîne-i Üsküdar’a tâbi‘ Çengâr karyesinde sâkin Osman Beşe b. Halil nâm kimesne meclis-i şer‘-i şerîf-i enverde bâ‘isetü hâzihi’l-kitâbi’l-müstetâb Atiyetullah Hanım bt. el-merhûm Mehmed Kemaleddin Efendi mahzarında ikrâr ve takrîr-i kelâm edip yedimde mülküm olup karye-i mezbûre hâricinde Çakaldağı nâm mahâlde kâin bir tarafdan benim âhar bağım ve bir tarafdan Ali Beşe bağı ve bir tarafdan sagīr Hamdullah arsası ve bir tarafdan tarîk-i âm ile mahdûd tahmînen yirmi dönüm mikdârı bir kıt‘a müfrez kürûmu mülk bağımı târih-i kitâbdan altı ay tamamına değin istirdâd-ı semen ve teslîm-i mebî‘ etmek üzere bey‘ bi’l-vefâ tarîkiyle mûmâ-ileyhâ Atiyetullah Hanım’a elli yedi buçuk guruşa bey‘ ve teslîm eylediğimde ol dahi ber-vech-i muharrer istirdâd ve kabûl eyledikden sonra meblağ-ı mezbûr elli yedi buçuk guruşu mûmâ-ileyhâ Atiyetullah Hanım yedinden tamamen ahz ü kabz eyledim dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî-gurreti Cemâziyelâhire sene 1197 Şühûdü’l-hâl: Müderrisîn-i kirâmdan Abbaszâde Feyzullah Efendi b. Mustafa Efendi, es-Seyyid Mehmed Ağa b. es-Seyyid Ömer, Molla Mehmed b. Osman, İsmail Ağa b. Abdullah.